Aktorja Sharon Stone ka thënë se një nga rolet e saj më të famshme bëri që ajo të humbasë kujdestarinë e djalit të saj në vitin 2004.
Paraqitja e saj në “Basic Instict” të vitit 1992 shtrembëroi perceptimet për të, sipas Stone, e cila ka treguar se për këtë është pyetur edhe djali i saj gjatë një seance gjyqësore.
"A e dini se nëna juaj bën filma seksi?”, ka cituar Stone gjykatësin i cili ia bëri këtë pyetje atë kohë djalit të saj katërvjeçar.
Stone dhe bashkëshorti i saj i atëhershëm, Ron Bronstein adoptuan djalin e tyre, Roan, në vitin 2000. Por kur çifti u divorcua në vitin 2004, gjykatësi ia dha kujdestarinë e djalit Bronsteinit.
Humbja i shkaktoi Stones dhimbje të forta, të cilat ajo i ka rrëfyer në podcastin “Table for Two”.
“Përfundova në klinikë me rrahje shtesë të zemrës”, ka deklaruar Stone.
Stone ka thënë se duke marrë parasysh se sa shumë skena seksi dhe lakuriqësie shfaqen nëpër televizione sot, trajtimi i saj pas filmit që u bë hit ishte brutal.
“E kam humbur kujdestarinë e fëmijës tim për këtë”, ka deklaruar aktorja hollivudiane, duke shtuar se ajo tani i shmang rolet e ngjashme.