Russell Brand deklarohet i pafajshëm për akuzat për përdhunim e sulm seksual

Aktori dhe komediani britanik, Russell Brand, është deklaruar i pafajshëm ndaj akuzave për përdhunim dhe sulm seksual gjatë paraqitjes së tij në Gjykatën e Kurorës në Southwark, në Londër.

50-vjeçari u paraqit në gjykatë të martën (24 shkurt 2026), ku konfirmoi identitetin e tij dhe u deklarua “i pafajshëm” për dy akuza që lidhen me ngjarje të dyshuara se kanë ndodhur në Londër në vitin 2009. Këto dy akuza kanë të bëjnë me dy gra, ka raportuar FemaleFirst.

Më herët, Brand ishte akuzuar për dy raste përdhunimi, një sulm të pahijshëm dhe dy sulme seksuale, që përfshijnë katër gra të ndryshme, për ngjarje që dyshohet se kanë ndodhur mes viteve 1999 dhe 2005. Në muajin maj, ai u deklarua i pafajshëm edhe për këto akuza fillestare.

Gjykimi për akuzat e para është caktuar të mbahet në muajin qershor, ndërsa një seancë tjetër do të vendosë nëse dy akuzat e reja do t’i bashkohen procesit gjyqësor.

Pas paraqitjes në gjykatë, Brand u lirua me kusht dhe pritet të rikthehet në një datë të mëvonshme.

Para seancës, ai ka folur shkurtimisht me gazetarët jashtë gjykatës. Kur u pyet si ndihej, ai iu përgjigj Sky News me një fjalë të vetme: “I bekuar”.

Brand, i cili është baba i tre fëmijëve me bashkëshorten e tij Laura Gallacher, i ka mohuar vazhdimisht akuzat që nga momenti kur u padit për herë të parë nga Policia Metropolitane vitin e kaluar.

“Gjithmonë ju kam thënë se kur isha i ri dhe beqar, para se të kisha gruan dhe familjen time... isha njeri budalla. Isha budalla para se të jetoja në dritën e Zotit. Isha i varur nga droga, i varur nga seksi dhe një i marrë. Por një gjë që nuk kam qenë kurrë, ka qenë përdhunues. Asnjëherë nuk jam përfshirë në aktivitete pa pëlqim. Lutem që ta shihni këtë duke më parë në sy”, ka thënë ai në një video të publikuar në rrjetet sociale.

Aktori ka shtuar se tani do të ketë mundësinë të mbrojë veten në gjykatë.

“Sigurisht, tani do të kem mundësinë t’i mbroj këto akuza në gjykatë. Dhe jam jashtëzakonisht mirënjohës për këtë”, ka thënë ai.

Akuzat për abuzim seksual ndaj tij dolën për herë të parë në publik në vitin 2023, si pjesë e një investigimi nga emisioni “Dispatches” i Channel 4 dhe gazeta The Sunday Times. Që nga ajo kohë, komediani ka mohuar vazhdimisht çdo pretendim për keqbërje.