Në një intervistë për një revistë britanike të modës, Rina Lipa, ka nisur të marrë hapat e parë të famës dhe t’i bëjë konkurrencë motrës, këngëtares me famë botërore, Dua Lipa.
Duke folur për revistën britanike “Tatler”, e cila numrin e parë e ka që nga viti 1901, vajza e vogël e familjes Lipa është fokusuar në jetën e kësaj familje dhe famën e motrës.
Rina Lipa ka thënë se e ka përjetuar shumë rëndë periudhën kur motra e saj më e madhe, Dua Lipa, e la shtëpinë për të ndjekur karrierën e saj, por ka thënë se e ka vlerësuar gjithmonë për lëvizjen e saj.
Krijuesja e hitit “Levitating”, që u lind në Londër, kaloi fëmijërinë në Kosovë, para se të kthehej në Britani të Madhe në moshën 15-vjeçare me shpresën për t’u bërë pop-yll.
“Ishte e re, por ishte e pjekur dhe e gatshme. Prindërit nuk e lejuan lehtë të largohej – gjithçka u bë në mënyrë të kontrolluar. U kthye disa herë dhe jetoi me një shoqe të familjes. Por ishte e vështirë. Më merrte malli shumë. Punonte shumë, tepër shumë. E admiroja për këtë dhe e admiroj edhe sot”, ka thënë ajo.
Këngëtarja 26-vjeçare më pas vazhdoi me karrierë të suksesshme, duke nisur gjithçka si modele e më pas duke lansuar albumet ndër më të suksesshmet në botë – atë të titulluar në bazë të emrit të saj më 2017 dhe “Future Nostalgia” më 2020.
Duke kujtuar fëmijërinë në Prishtinë, Rina ka thënë se periudha më e pëlqyer e së kaluarës kishte të bënte me veshjet e Duas.
Edhe
“KOHA Ditore”, 2015. Dua Lipa: Ende jam vetëm në hapat e parë
“E adhuroja. Kur doja të vishesha si ajo, ia vidhja rrobat. Kur i vishja, ndihesha më e madhe. Ende është kështu. Shpesh shikoj në dollapin e saj dhe i them ‘nuk e ke veshur qe një kohë të gjatë këtë’. Ajo nxehet dhe menjëherë më thotë ‘kthema’”, ka treguar Rina.
Rina, që është aktore në rritje dhe yll i ri i rrjeteve sociale, ka thënë se familja e saj kënaqet me familjen e së dashurit të Duas, Anwar Hadid. Të dyja familjet i ka quajtur “kreative” dhe shumë të dashura.
Intervista e plotë e Rina Lipës është publikuar në numrin e janarit të revistës “Tatler”. Aty 20-vjeçarja prezantohet si sensacion i Instagramit e yll në rritje i aktrimit.
