Chris Evans dhe Ana de Armas e ndoqën premierën e filmit të tyre të ri me spiunë, “Ghosted”, në New York City. Ky është projekti i tretë që i sjell ata së bashku në ekran të madh.
“Është shumë e lehtë, ne e kemi një kimi të bukur me Anan. Ajo është vërtetë e mrekullueshme në çdo gjë që bënë. Prandaj, kur je në sheshin e xhirimit me të, thjeshtë duhet të qëndrosh në njërën anë dhe të mos e pengosh në punë”.
Edhe aktorja latine e ndanë të njëjtin mendim dhe vlerësim për kolegun e saj.
“Ne në përgjithësi e pëlqejmë njëri-tjetrin nga dita e parë kur u takuam në sheshin e xhirimeve të filmit ‘Knives Out’. Nuk dukej sikur ishim të panjohur. Pra, e kemi ndërtuar një raport të bukur shoqëror. Nuk është një shoqëri për të cilën duhet të punosh shumë për ta ruajtur. Ne thjeshtë mirëkuptohemi lehtë”.
Duke e lënë pas reputacionin e superheroit, në “Ghosted”, Chris Evans vjen në rolin e një burri të dashuruar marrëzisht pas një agjenteje të fshehtë të CIA-së, e cila vjen e portretizuar nga Ana de Armas. Cole e përjeton një takim të mrekullueshëm me Sadien, por kur provon ta kontaktojë atë për t’u ritakuar, ajo nuk i përgjigjet mesazheve të tij. Eventualisht ai e mëson se Sadie është një agjente e fshehtë, kjo pasi pa dashje përfshihet në një prej misioneve të saj të rrezikshme.
Por, fatkeqësisht fansat nuk do të mund ta shohin aktorin në rolin e Captain Americas edhe për një kohë të gjatë. Evans ka deklaruar publikisht se është ende herët që ai ta përsëris rolin e superheroit të dashur të “Marvelit”.
Megjithatë, pavarësisht vëmendjes që i kushtohet këtij personazhi, ai tha se nuk shqetësohet kur e pyesin për këtë.
“Jo nuk bezdisem aspak. Unë e adhuroj atë rol dhe atë kapitull të jetës sime. Dhe për shkak të kësaj dashurie mundohem ta ruaj dhe të çmoj këtë eksperiencë. E vërteta është se nuk dua të bëjë diçka që do t’ia humbte vlerat atyre projekteve të mrekullueshme, pjesë e së cilave isha edhe unë”.
Ndërkohë, de Armas tregoi se është shumë e lumtur që do ta ketë rolin kryesor në filmin e ardhshëm “Ballerina”, që është version i ri i filmave të njohur aksion, “John Wick”. Ky projekt do ta ketë premierën vitin e ardhshëm.
Yjet e Hollywoodit të cilët publiku i ka parë së bashku në filmat, “Knives Out” dhe “The Gray Man”, janë ribashkuar në ekran të madh falë insistimit të regjisorit, Dexter Fletcher, i cili gjendet prapa këtij projekti që i takon zhanreve romancë, aksion, aventurë dhe komedi.
“Kur i bënë bashkë këta të dy, ndodhë një eksplodim kimik. Bëjë shaka, por e vërteta është se ata janë miq të mirë dhe kanë shumë respekt për njëri-tjetrin. Ky është filmi i tretë që e realizojnë së bashku dhe tashmë e kanë krijuar një shoqëri natyrale dhe një lidhje të fortë të cilën unë si regjisor pata mundësinë ta eksplorojë në këtë film. Sepse kur i sheh së bashku në ekran, ti thjeshtë beson se janë çift dhe bënë tifo për ta. E kjo ndodhë pikërisht për shkak se e kanë një shoqëri të çiltër”.
Aktorja latine e zëvendësoi yllin e kinematografisë, Scarlett Johansson, në rolin e protagonistes së këtij filmi. Ajo po ashtu shërben si producente ekzekutive e projektit, krahas kolegut dhe mikut të saj, Evans.
Krahas tyre në film po ashtu luajnë aktorët, Amy Sedaris, Tate Donovan, Lizze Broadway, Adrien Brody dhe Tim Blake Nelson.
“Ghosted” ka filluar së shfaquri në platformën Apple TV+ nga 21 prilli.
