Zëri i saj i veçantë është bërë një urë lidhëse me këngët e vjetra qytetare.
Kafenetë e kryeqytetit janë skena kryesore e Nezafete Shalës dhe anëtarëve të grupit “Melodia e Vjetër”, transmeton emisioni Express në KTV.
Vitet vetëm se ia kanë forcuar besnikërinë ndaj muzikës autentike shqiptare dhe këngët që i interpreton sot, e kanë përcjellë që nga fëmijëria.
“Melodia e Vjetër” përbëhet nga anëtarët e familjes Shala, Agim Malazogu e Lulzim Kazazi dhe grupi është aktiv që nga viti 1980.
Me instrumentet muzikore def, harmonikë e mandolinë, meloditë dhe zërat e tyre vijnë përmes një gjuhe të natyrshme muzikore.
Defi dhe veshjet me motive kombëtare janë identifikuese për origjinalitetin e Nezafete Shalës.
Përmes mbrëmjeve koncertale me një program të pasur me këngë të Shqipërisë së Mesme, ata po dëgjohen nga publiku i moshave të ndryshme, sidomos nga të rinjtë.
Nezafete Shala, para disa dekadash, mori hov me incizimet e saj në Radio Prishtinë dhe prej atëherë, është paraqitur në festivale të ndryshme.
Nezafete Shala ka përfunduar studimet bachelor për muzikë në Universitetin e Prishtinës dhe studimet master në Zagreb. Kohëve të fundit, ajo e ka shtuar prezencën në skenën e kryeqytetit.