Në botën e filmit të projekteve të shumëpritura gjithmonë me padurim pritet të shihet se kush do ta marrë rolin kryesor, veçanërisht nëse ky rol është i një prej personazheve më të famshme të stripave. Batmani i ri, trilogjinë e re të të cilit do të duhej ta drejtojë Matt Reeves, është në prag të përzgjedhjes së aktorit të ri.
Nga burime të ndryshme vijnë informacionet që Robert Pattinson, tinejxheri i përjetshëm nga saga Twilight, tashmë është zgjedhur që ta bartë pelerinën e zezë, por mësojmë se ky informacion ende nuk është konfirmuar, dhe se për këtë rol ai është duke “luftuar” me Nicholas Hoult.
Mbështete KOHËN. Ruaje të vërtetën.
Gazetaria profesionale është interes publik. Mbështetja juaj ndihmon që ajo të mbetet e pavarur dhe e besueshme. Kontribuoni edhe ju. 1 euro e bën dallimin.
Letër lexuesit — pse po kërkojmë mbështetjen tuaj Kontribuo
Pattinson dhe Hoult janë në përzgjedhjen e ngushtë për rolin e Bruce Wayne të ri, dhe thuhet se Pattinson e ka një avantazh të vogël krahasuar me Hoult, të cilin do ta shohim në rolin e Tolkien dhe përsëri në filmat e X-Men.
Reeves, i cili e mori përsipër regjinë e filmave për Batmanin nga vetë Batmani, Ben Affleck, pasi që ky i fundit u largua nga roli dhe regjia e filmit, së shpejti do të duhet ta përzgjedhë heroin e tij, sepse me produksionin duhet të fillojë nga fundi i këtij viti ose në fillim të vitit të ardhshëm. Warner Bros i ka dhënë Reevesit mjaft kohë për ta shkruar skenarin me shpresën se ai do ta bëjë këtë punë si duhet, veçanërisht pas zhgënjimit që e sollën filmat “Batman v Superman” dhe “Suicide Squad”.
Se a do t’ia kthejë Reeves lavdinë e vjetër të Batmanit dhe a do ta ekranizojë atë mirë Pattinson/Hoult, këtë do ta zbulojmë më 25 qershor 2021, kur filmi do të mbërrijë në kinema.