Gjykatësi federal në Los Angeles ka vendosur që Katy Perry së bashku me ekipin e saj duhet ta paguajnë një dëmshpërblim prej 2.8 milionë dollarësh për plagjiaturën e këngës së vitit 2013 "Dark Horse".
Vendimi vjen tri ditë pasi që komisioni konstatoi se Perry, shtëpia e saj diskografike dhe bashkëpunëtorët e tjerë janë përgjegjës për shkeljen e së drejtës autoriale, shkruan KOHA Ditore. Më konkretisht, disa pjesë të këngës "Dark Horse" ngjajnë me "Joyful Noise", këngë kjo rap e krishterë e vitit 2008 nga artisti Flame, emri i vërtetë i të cilit është Marcus Grey.
Sipas aktvendimit, Perry duhet t’i paguajë 550.000 dollarë, ndërsa shtëpia e saj diskografike Capitol Records detyrohet t’i paguajë afro 1.3 milionë dollarë. Janë gjobitur edhe pesë bashkëpunëtorë të këngëtares së njohur të cilët morën pjesë në kompozimin e këngës, përfshirë producentin Max Martin, i cili gjobitet me 253.000 dollarë, dhe dr. Luke i cili duhet t’i paguajë 61.000 dollarë, ndërsa kompania e tij, Kasz Money Inc. duhet t’i paguajë 189.000 dollarë.
Gjykatësi vendosi gjithashtu që 22.5 për qind e fitimeve të realizuara nga kënga "Dark Horse" duke e mbajtur vendin e parë në listën Billboard Hot 100 duhet t'i takojnë këngës "Joyful Noise".
"Klienti ynë e ngriti këtë padi pesë vjet më parë duke kërkuar drejtësi dhe kompensim të drejtë për marrjen e paligjshme të krijimit të tij të vlefshëm. Ishte ky një udhëtim i gjatë dhe i vështirë, por ai më në fund e fitoi drejtësinë", tha Michael A. Kahn, avokat i artistit Grey.
T’ju rikujtojmë, singli "Dark Horse" u publikua në vitin 2013, në studio- albumin e katërt të Katy Perry. Kjo këngë është shitur në mbi 13 milionë kopje dhe konsiderohet si një nga hitet më të mëdha të këngëtares amerikane.
