Jessie J detyrohet të anulojë koncertet për shkak të një operacioni të dytë nga kanceri i gjirit

Këngëtarja britanike Jessie J është detyruar të anulojë koncertet e saj në SHBA pasi i duhet t’i nënshtrohet një operacioni të dytë, pas betejës së saj me kancerin e gjirit.

Artistja 37-vjeçare, në muajin qershor, ka zbuluar se kishte kryer një mastektomi, ndërsa këtë javë njoftoi se do t’i duhet një tjetër ndërhyrje kirurgjikale deri në fund të vitit, ka raportuar FemaleFirst.

“Siç e dini disa prej jush, vetëm tetë javë më parë pata një operacion për kancerin e gjirit, ky është hapi i parë. Hapi i dytë është se, fatkeqësisht, më duhet të bëj edhe një operacion tjetër. Nuk është diçka shumë serioze, por duhet bërë deri në fund të vitit dhe, fatkeqësisht, kjo bie në mes të turneut që kisha planifikuar”, ka thënë ajo në një video të publikuar në Instagram.

Stories • Instagram

Jessie ka shpjeguar se koncertet në Britani dhe Evropë do të shtyhen për në muajin prill të vitit 2026, ndërsa datat në SHBA janë anuluar, pasi është e vështirë të riplanifikohen.

“Ende nuk kam arritur të gjej një mënyrë për t’i përshtatur datat në SHBA, ndaj, fatkeqësisht, ato do të anulohen. Por unë po përpiqem të gjej një hapësirë kohore vitin tjetër për t’i bërë përsëri. Ju lutem keni durim, është diçka që dua ta bëj, por vetëm kur të vijë koha e duhur”, ka theksuar këngëtarja e hitit “Domino”.

Edhe pse vendimi e ka lënduar, Jessie ka thënë se shëndeti i saj është prioritet.

“Jam shumë e mërzitur dhe e trishtuar. Por gjithashtu, kjo është ajo që është. Më duhet të shërohem dhe ky është vendimi i duhur. Kështu që e shtyj turneun për vitin e ardhshëm”, ka thënë ylli.

Ajo ka shtuar se po përpiqet të ruajë qetësinë dhe të fokusohet te procesi i shërimit.

“Po përpiqem të jem në moment dhe të ndaj me kujdes energjinë time aty ku duhet. Por unë duhet të shërohem, prandaj më falni. E di që kjo është zhgënjyese, por ndoshta e kishit pritur. Ju dua shumë të gjithëve, më duhet të mbyll para se të shpërthej në lot”, ka thënë këngëtarja.