Phoenix dhe Mara vijnë si çift edhe në ekran të madh

Joaquin Phoenix dhe e fejuara e tij, Rooney Mara, do të luajnë përkrahë njëri-tjetrit në trilerin e ardhshëm, “The Island”

“The Hollywood Reporter” raporton se ylli i filmit “The Joker” dhe aktorja 37-vjeçare, do ta portretizojnë një çift të pasur që shpërngulet në një ishull të braktisur, me qëllimin për të jetuar në privatësi të plotë dhe nga natyra.

Ikja e çiftit nga shoqëria pengohet me ardhjen në ishull të mediave dhe një konteshe të pasur, e cila planifikon ta ndërtojë një resort luksoz atje. Më pas, mes çiftit dhe konteshës ndodhë një luftë psikologjike dhe grindjet e tyre përfundimisht çojnë në vrasje.

Mediat kanë bërë të ditur se puna rreth realizimit të filmit, “The Island”, do të fillojë vitin e ardhshëm. Ende nuk është bërë e ditur ndonjë datë e lansimit të tij nëpër kinema.

Çifti i njohur i showbizit, Phoenix dhe Mara, u takua gjatë xhirimeve të dramës romantike të vitit 2012, “Her”. Dy aktorët, që kanë luajtur krahas njëri-tjetrit edhe në disa projekte të kaluara, u fejuan në vitin 2019 dhe së bashku e kanë një djalë dy vjeçar të quajtur, River Lee.