Bebe Rexha po hyn në një epokë të re me albumin e ri

Këngëtarja e hitit “I Got You”, shqiptarja me famë botërore, Bebe Rexha, ka prezantuar për herë të parë projektin pasues të albumit të vitit 2023, “Bebe”, me “Dirty Blonde [The Super Dirty Cut]”, një miks katërminutësh me energji të lartë që bashkon 13 këngët e saj të ardhshme dhe elemente të videove përkatëse në një publikim të mbushur me adrenalinë.

Ky miks shoqërohet edhe me këngën kryesor të albumit të saj të katërt, “I Like You Better Than Me”.

Fansat janë ftuar të “këpusin, ri-miksojnë dhe rindërtojnë” miksin dhe ta shpërndajnë atë në rrjetet e tyre sociale, një lëvizje e zgjuar për të siguruar promovim falas për projektin, ka shkruar FemaleFirst.

Me ndihmën e labelit të pavarur EMPIRE, Rexha synon të nisë këtë epokë të re në një mënyrë që ndiehet e menjëhershme, sfiduese dhe krejt në termat e saj.

“Kapitulli i ardhshëm ka të bëjë me lirinë krijuese, besimin në instinktet e mia, besimin në zërin tim dhe të bëj gjërat ashtu si gjithmonë kam dashur. Kam mësuar shumë, kam jetuar shumë dhe tani jam plotësisht e lidhur me veten time. Të ndjek intuitën ka qenë një nga vendimet më të mira që kam marrë në karrierën time. Kjo epokë është e guximshme, e zëshme dhe pa kompromis, pa filtra, pa kufij. DIRTY BLONDE është ajo që unë zotëroj saktësisht, atë që jam”, ka thënë ajo në një deklaratë.

Rexha duke vepruar sipas mënyrës së saj vjen pothuajse dy vjet pas kohës kur kërcënoi të zbulonte skandalet e industrisë muzikore, për të cilat ka thënë se është “detyruar” të heshtë.

“Kam qenë shumë e kufizuar. Kam qenë shumë e heshtur për shumë kohë. Nuk kam parë shenjat edhe pse njerëzit vazhdimisht i përmendin dhe ato ishin AQ TË DUKSHME. Dhe kur kam folur, më kanë heshtur dhe më kanë PËRNDJEKUR nga kjo industri. Gjërat duhet të ndryshojnë ose unë do të tregoj TË GJITHA të vërtetat e mia. Të mirat, të këqijat dhe të shëmtuarat”, pati shkruar ajo në X.

Më vonë, këngëtarja 36-vjeçare pati treguar se ndihet e trishtuar.

“Po ulem në dhomën time të hotelit në Londër duke qarë. Kam ndjerë dëshpërim për kaq shumë kohë. Kam ecur shumë nëpër këtë qytet dhe kam takuar fansa, dhe ata kanë ndezur diçka brenda meje”, pati thënë ajo.

Albumi i saj i ri, Dirty Blonde [The Super Dirty Cut], del më 12 qershor.

Kënga “I Like You Better Than Me” është tashmë në të gjitha platformat kryesore të transmetimit, ndërsa kënga “Dirty Blonde [The Super Dirty Cut]” është e disponueshme në kanalin zyrtar të Rexhës në YouTube.