-
Përktheu:
Vita Abrashi-Kajtazi
- 11 gusht 2026 10:30
- Shpërndaje në:
Aktorja e njohur, Angelina Jolie, ka folur për filmin e saj të ri “Without Blood”, një dramë lufte që trajton traumën, kujtesën dhe mënyrën se si njerëzit përballen me plagët e së kaluarës, ka shkruar People.
Jolie, 51 vjeçe, ka shkruar skenarin dhe është regjisore e filmit, i cili interpretohet nga Salma Hayek dhe Demian Bichir. Filmi është bazuar në romanin me të njëjtin titull të shkrimtarit italian Alessandro Baricco.
“Më pëlqeu romani i shkruar bukur i Alessandro Bariccos, sepse ai trajton të vërteta universale për konfliktin, kujtesën dhe atë që do të thotë të jesh njeri”, ka thënë Jolie.
Ajo ka treguar se ka synuar të qëndrojë sa më besnike ndaj librit.
“Zgjodha t’i qëndroja shumë besnike. Qasja ime ishte më shumë ta formësoja dhe ta redaktoja sesa ta shkruaja”, ka thënë ajo.
Edhe
Angelina Jolie rikthehet si regjisore me dramën "Without Blood"
Sipas Joliet, filmi mund të prekë njerëzit, sidomos ata që kanë kaluar trauma dhe po përpiqen të shërohen.
“Filmi është për këdo që kërkon përgjigje dhe shërim pas një traume. Libri flet për mënyrën se si shpesh ‘kthehemi aty ku jemi thyer’. Kjo është e vërtetë për pothuajse të gjithë. Askush nuk e di se çfarë ka kaluar një person tjetër. Të ulemi dhe të flasim me hapje dhe sinqeritet është një fillim”, ka thënë ylli.
Jolie ka vlerësuar gjithashtu aktorët, duke thënë se rolet kërkonin shumë guxim dhe përkushtim emocional.
Duke folur për mënyrën se si ka ndryshuar ajo vetë me kalimin e viteve, Jolie ka thënë se sot i sheh ndryshe personazhet dhe temat që interpreton.
“Kur isha më e re, kisha pyetje të tjera për të qenit njeri dhe ndjenja të tjera. Tani që jam rritur, kuptoj disa gjëra dhe kam pyetje të tjera”, ka thënë ajo.
Edhe
The Guardian: Angelina Jolie nuk është zgjedhja e duhur për filmin rreth modës, “Couture”
Jolie, e cila luajti rolin e Maria Callas në filmin biografik “Maria” të vitit 2024, ka pranuar se përvoja e jetës e ka ndihmuar të kuptojë më mirë personazhet që interpreton.
“Ndoshta është interesante që tani po interpretoj një personazh që mendon thellë për vdekjen dhe për pasojat e disa gjërave në jetë, gjëra që sigurisht nuk do t’i kisha kuptuar në të 20-at”, ka thënë ajo.
