Alexander Skarsgård bëhet Randall Flagg

Këto ditë, Stephen King gjatë promovimit të librit të tij të ri “The Institute” dhe të filmit të ri të bazuar sipas veprës së tij “IT Chapter Two”, i zbuloi anëtarët e rinj të kastit të përshtatjes së një prej veprave të tij: “The Stand”.

Në ekipin e aktorëve të cilët i paralajmëroi King janë Jovan Adepo si Larry Underwood, Owen Teague si Harold Lauder, Brad William Henke si Tom Cullen dhe Daniel Sunjata në rolin e Cobbit.

Një emër të cilin King nuk e përmendi, ndërsa u zbulua më vonë, është Alexander Skarsgård, shkruan KOHA Ditore. Ylli i serive “True Blood” dhe “Big Little Lies” është i gatshëm ta luajë personifikimin e së keqes, Njeriun në të zeza - z. Randall Flagg.

James Marsden, Amber Heard, Odessa Young dhe Henry Zaga janë konfirmuar më parë për angazhimin e tyre në 10 episode të serisë apokaliptike të King, ndërsa Whoopi Goldberg e ka konfirmuar vetë se ajo do të shfaqet në rolin e Nënës Abagail.

Vetë King e shkruan skenarin e episodit të dhjetë dhe të fundit, i cili do të përmbajë diçka të re në lidhje me romanin origjinal të vitit 1978. Ngjarja zhvillohet para, gjatë dhe pas një sëmundjeje shkatërruese e cila i vret 99 për qind të popullsisë në botë. Në ngjarje krijohen aleanca dhe komunitete të reja pas kësaj tragjedie, siç janë strehimi i qetë dhe i sigurt i drejtuar nga Nëna Abagail nga njëra anë, ndërsa nga ana tjetër është qyteti i egër pa ligje të cilin e udhëheq Flagg demonik.