A$AP Rocky shfaqet në gjykatë bashkë me Rihannan dhe dy djemtë

Gjykimi i reperit, A$AP Rocky solli një përplasje të fortë dhe argumente ndërmjet prokurorit dhe avokatit mbrojtës, ndërsa partnerja e tij, këngëtarja Rihanna dhe dy fëmijët e tyre të vegjël ishin të pranishëm në sallën e gjyqit, ka raportuar agjencia e lajmeve Associated Press.

A$AP Rocky akuzohet për të shtëna me armë ndaj një ish-miku të tij në rrugët e Hollywood-it në vitin 2021.

Prokurori i çështjes, Paul Przelomiec, e pyeti jurinë nëse arma ishte e vërtetë apo false.

“Ka një pyetje të rëndësishme për t'u përgjigjur. A ishte një armë e vërtetë apo ishte një armë false? Asgjë tjetër nuk është në diskutim”, ka thënë Przelomiec.

Prokurori ka argumentuar se Rocky është fajtor për akuzën e sulmit me një armë automatike, ndërsa avokati i tij, Joe Tacopina, e quajti dëshmitarin kryesor të akuzës “gënjeshtar patologjik i zemëruar” që ka bërë përgënjeshtrime të njëpasnjëshme.

Për herë të parë, Rihanna erdhi në gjyq me dy djemtë e saj të vegjël, 2-vjeçarin RZA dhe 1-vjeçarin Riot, të cilët u panë me kostume dhe mund të dëgjoheshin duke bërë zhurma ndërsa prokurori fliste. 
Rihanna mbante një nga ta në prehër dhe tentonte ta mbante të qetë me një lodër.

Seanca e mbajtur të enjten ka përfunduar me dy argumente të kundërta: prokurori ka thënë se Rocky e ka qëlluar me armë të vërtetë, ndërsa avokati mbrojtës pretendon se arma ishte false që shkrep vetëm pa plumba dhe që ai e kishte marrë nga seti i një videoje muzikore që e kishte bërë me Rihannën për këngën “DMB”.

Edhe Showbiz 30 jan 2025 Rihanna mbështet A$AP Rockyn në gjykatë

Përveç kësaj, të dy palët diskutuan në lidhje me dëshmitarët dhe provat që mund të kenë ndihmuar apo penguar çështjen. 

Prokurori akuzoi disa nga dëshmitarët e mbrojtjes dhe i quajti “gënjeshtarë të koordinuar”, ndërsa mbrojtja thoshte se dëshmitarët ishin të sinqertë dhe koherentë.

A$AP Rocky mund të përballet me deri 24 vjet burgim nëse shpallet fajtor, por juria ende nuk ka marrë një vendim dhe do të nisin diskutimet pas mbrojtjes përfundimtare.