Këngëtarja 20-vjeçare, Billie Eilish, ka treguar se gjithmonë ka dashur të ketë fëmijë dhe ky vazhdon të jetë një prej qëllimeve kryesore në jetën e saj, raporton portali “Female”. Por gjithashtu e pranon që ka frikë të bëhet nënë, ngase shqetësohet për mbrojtjen e fëmijëve të saj ndërsa ata rriten.
“Më parë do të vdisja sesa të mos bëhem me fëmijë. Unë kam nevojë për ta në jetën time. Me kalimin e moshës dhe sa më shumë gjëra që i përjetoj, filloj të shqetësohem për mënyrën si t’i rris ata. Sidomos në situatat kur unë nuk do të pajtohem me mënyrën se si ata i shohin gjërat”, deklaroi këngëtarja për revistën “Sunday Times”.
Si fëmijë, Billie është shkolluar në shtëpi së bashku me vëllanë e saj, Finneas. Ajo u diplomua në moshën 15-vjeçare kur e dha provimin e maturës së shkollës së mesme.
Duke folur për problemet me të cilat përballen fëmijët sot në Amerikë, Billie rrëfeu se ndihet e tmerruar nga frika e të shtënave me armë zjarri nëpër shkolla.
“Pse është bërë diçka e zakonshme të kesh frikë të shkosh në shkollë? Fëmijët shkojnë në shkollë dhe duhet të jenë të përgatitur për një përvojë traumatike që ua ndryshon jetën përgjithmonë ose edhe të vdesin. Ku ka logjikë në këtë gjë?”.
Ylli i hitit “Bad Boy” së fundmi foli hapur për sfidat që ia ka sjellë fama, me ç’rast e pranoi se ishte shndërruar në një tinejxhere të pakënaqur që vuante nga depresioni, pavarësisht se arriti suksese të jashtëzakonshme me lansimin e albumit debutues, “When We All Fall Asleep, Where Do We Go?”, në moshën vetëm 17-vjeçare.
“Unë vërtetë nuk e doja suksesin dhe famën për disa vjet. Në fillimet e karrierës sime isha shumë e re në moshë dhe ndihesha e pakënaqur dhe në depresion. Madje nuk isha e sigurt që e doja suksesin që e kisha arritur dhe gjërat tjera që vinin me të”, deklaroi këngëtarja.
Nga atëherë, Billie Eilish i ka bërë disa ndryshime në mënyrën e organizimit të koncerteve dhe në planifikimin e angazhimeve muzikore, prandaj edhe ka filluar ta shijojë punën më shumë.
© KOHA. Të gjitha të drejtat janë të rezervuara.
