Videoprojekti i fundit i këngëtarit britanik Sam Smith me titull, “Love Me More”, po e kryeson toplistën e këngëve të reja, raportoi të hënën portali “Billboard”.
Adhuruesit e muzikës votuan në një sondazh të publikuar të premten (29 prill), duke e përzgjedhur himnin e ri të dashurisë së pop yllit Smith, si këngën e tyre të preferuar të javës.
Projekti muzikor fuqizuese i titulluar “Love Me More”, është lansimi i parë i këngëtarit nga viti 2020, kur e publikoi albumin “Love Goes”.
Kënga është shkruar për të gjithë personat që ndihen ndryshe nga të tjerët, që për çdo ditë duhet ta frenojnë veten që të mendojnë ose flasin keq për veten, dhe të mësohen ta pranojnë dhe duan veten ashtu siç janë.
“Love Me More” i mori më shumë se 78 për qind të votave të publikut në sondazhin e portalit muzikor “Billboard”.
Kënga e cila është publikuar me videoklip në platformën YouTube, i numëron më shumë se 1.3 milionë klimike brenda 3 ditëve të para të lansimit.
Ylli i hitit “Promises” tashmë është duke punuar rreth albumit të tij të katërt të incizuar në studio. Sam Smith e ka një prej zërave më të mirë në industrinë e muzikës. Ky fakt e ka bërë edhe më të veçantë jetësimin e këngëve të cilat i ka shkruar ndër vite, e që zakonisht i dedikoheshin dashurisë së humbur dhe zemërthyerjes.
© KOHA. Të gjitha të drejtat janë të rezervuara.
