Kate Winslet e merr me shumë përgjegjësi punën e saj si aktore
Ylli i kinematografisë, Kate Winslet, thotë se nuk e lejon të bie etika e saj e punës, ngase sot ekzistojnë shumë aktore të mrekullueshme të cilët garojnë për role në projekte të ndryshme kinematografike.
Aktorja 45-vjeçare nga Britania e Madhe e filloi karrierën si aktore në vitin 1991, kur ajo ishte vetëm 15-vjeçare, duke luajtur në serialin fantastiko-shkencor të kanalit BBC, “Dark Season”, i cili ishte shkruar nga Russell T. Daviesl. Kurse debutimin në film, Winslet e shënoi në vitin 1994 me projektin e vlerësuar të regjisorit Peter Jackson, “Heavenly Creatures”. Nga atëherë, rolet e suksesshme nuk janë ndalur për aktoren.
Aktualisht, Kate po merr vlerësime të larta për performancën e shkëlqyer në dramën kriminalistike të kanalit HBO, “Mare of Easttown”, dhe ajo nuk ka ndërmend të pushojë së punuari dhe sfiduari veten si aktore, duke i ndjekur kështu këshillat e babait të saj rreth etikës së punës.
Në një intervistë të fundit për revistën “My Weekly”, Winslet tha: “Nuk ka rëndësi qe sa kohë e bëjë këtë profesion, thjeshtë nuk duhet të ndalesh së punuari vetëm pse tashmë e ke arritur famën. Kështu më thoshte gjithmonë babai im dhe unë vërtetë e besoj këtë. Plus tani po jetojmë në një botë kur ekzistojnë aq shumë aktore të mrekullueshme, fakt ky i cili më gëzon tej mase, por kjo nënkupton se të gjitha duhet të kontribuojmë në industrinë e filmit. Prandaj duhet të qëndrojmë aktive dhe të punojmë shumë në jetë”, ka deklaruar ylli i filmit “Titanic”. aktorja.
Winslet e cila në vitin 2009 e fitoi një çmim “Oscar” në kategorinë “Aktorja më e mirë”, për performancën e saj si ish-roje naziste e kampit të përqendrimit në filmin, “The Reader”, po ashtu thotë se kur është duke e xhiruar ndonjë projekt, asnjëherë nuk lejon që përkushtimi i saj ndaj rolit të bie sepse, sipas saj, publiku mund ta vërejë kur aktorët nuk e japin 100 përqindëshin para kamerave.
