Aktori 51-vjeçar, Hugh Jackman, është në bisedime e sipër për t’u angazhuar në rolin e Enzo Ferrarit, themeluesi i kompanisë ikonike të veturave italiane, në një projekt të ardhshëm biografik.
Regjisori Michael Mann e ka ripërpunuar skenarin e shkruar nga Troy Kennedy Martin dhe e ka bazuar tregimin e tij mbi librin biografik “Enzo Ferrari: The Man and the Machine”.
Mann do ta prezantojë këtë projekt para distributorëve në tregun virtual të festivalit të Kanës, ndërsa puna rreth filmit pritet të fillojë në prill të vitit 2021, transmeton Koha.
Me titull “Ferrari”, ngjarja e filmit zë vend në verën e vitit 1957, derisa kompania e Enzos përballet me katastrofë financiare dhe martesa e tij me Lauran ishte në krizë. Biznesmeni i njohur e kishte rrezikuar të ardhmen e tij dhe të kompanisë, duke marrë pjesë në garën legjendare përreth Italisë, “Mille Miglia”. Gjatë asaj kohe, Laura i zbulon disa sekrete të mëdha rreth burrit të saj dhe ngasësit e veturave në këtë garë përballen me limite të rrezikshme.
Michael Mann ka vite të tëra që mezi ka pritur të punojë rreth këtij projekti dhe besohet se tashmë i ka diskutuar disa prej skenave më të rëndësishme të filmit edhe me aktorin Hugh Jackman.
Regjisori 77-vjeçar së fundmi e ka bërë të ditur lajmin se është duke punuar në vazhdimin e ri të filmit “Heat”, trileri kriminalistik i vitit 1955 i cili në rolet protagoniste atëkohë i solli aktorët Al Pacino dhe Robert De Niro.
© KOHA.
