Keanu Reeves dhe Alex Winter përsërisin rolet e para 30 vjetëve

Filmi ikonik “Bill & Ted” do të rikthehet në kinema me vazhdimin e dytë, më 21 gusht të këtij viti, dhe kompania e cila e bën distribuimin e këtij projekti, “Orion Pictures”, tashmë e ka publikuar trilerin e tij të parë.

30 vjet pas lansimit të filmit të parë me titull “Bill & Ted's Excellent Adventure”, i cili e shtjellonte historinë e dy tinejxherëve të hallakatur teksa udhëtojnë nëpër kohë për ta krijuar një raport përfundimtar të historisë, në vazhdimin e ri me titull “Bill & Ted Face the Music” aktorët Keanu Reeves dhe Alex Winter i përsërisin rolet e tyre, dhe kështu e nisin edhe një aventurë të re të udhëtimit në kohë.