“Rocketman” do të shfaqet nëpër Britani të Madhe i shoqëruar nga një orkestër live

“Rocketman” do të shfaqet nëpër Britani të Madhe i shoqëruar nga një orkestër live

12 February 2020 10:35

Filmi “Rocketman” do të prezantohet drejtpërdrejt në koncerte përreth Britanisë së Madhe dhe Irlandës, me një orkestër të plotë e cila i performon live këngët e shoqëruara nga pamjet e filmit.

“Rocketman” e rrëfen historinë e jetës së Elton Johnit dhe rrugëtimin e tij për t’u bërë një prej artistëve më të suksesshëm të skenës muzikore. Me regji të Dexter Fletcherit dhe skenar nga Lee Hall, filmi e sjellë aktorin e shpërblyer me disa çmime, Taron Egerton, në rolin e ikonës së muzikës John.

Filmi do të shfaqet në një ekran gjigant dhe ultra-HD, derisa orkestra e vendosur në skenë e sjellë në jetë muzikën e Elton Johnit. I gjithë ky organizim do të jetë pjesë e turneut, “Rocketman Live In Concert – the Film with Live Orchestra”, transmeton Koha.net.

Duke filluar në Dublin më 3 qershor, turneu do të ndalojë edhe në qytete të tjera si: Birminghami më 5 qershor, Brightoni më 11 qershor, Londra më datë 13 qershor dhe Glasgow më 17 qershor, përpara se të përmbyllet me finalen e madhe në Edinburgh më 18 qershor.

Biletat e koncerteve do të dalin në shitje këtë të premte, më 14 shkurt.

Përveç Egertonit, i cili i interpreton hitet më të mëdha të Elton Johnit si: “Your Song”, “Tiny Dancer” dhe “I’m Still Standing”, në film gjithashtu luan aktori Jamie Bell, në rolin e bashkëpunëtorit të këngëtarit në shkrimin e këngëve, Bernie Taupin. Aktori Richard Madden e portretizon menaxherin e parë të muzikantit, John Reid, dhe Bryce Dallas Howard vjen në rolin e nënës së tij, Sheila Farebrother.

Filmi i lansuar në vitin 2019 i fitoi disa shpërblime, përfshirë këtu një Oscar në kategorinë “Kënga më e mirë origjinale, si dhe i ka arkëtuar më shumë se 195 milion dollar në arkat filmike botërore.

© KOHA

Komentet

Shto koment

Të ngjashme