Shkrimtari serb Vladimir Arsenijeviq është sulmuar të shtunën në Beograd nga një grup prej mbi 20 personash gjatë përgatitjeve për organizimin e një aktiviteti përkujtimor për gjenocidin e Srebrenicës. Si pasojë e incidentit, aktiviteti është anuluar.
Arsenijeviq u sulmua pranë Urës së Brankos, pak para fillimit të ceremonisë së planifikuar për përkujtimin e viktimave të gjenocidit në Srebrenicë.
“Sot në mëngjes, kur erdha këtu, më rrethoi një grup prej 20 deri në 30 personash, të cilët më goditën, më kërcënuan me fjalor tashmë të njohur dhe e mbuluan të gjithë këtë hapësirë me mesazhet e tyre”, ka thënë Arsenijeviq përmes një video në rrjetet sociale.
Megjithëse aktiviteti i sotëm u anulua, ai ka thënë se sulmi nuk do t'i ndalë organizatorët të vazhdojnë punën dhe angazhimin e tyre.
VIDEO:
Para incidentit, në orët e hershme të mëngjesit, koalicioni “Njerëzit Kujtojnë Njerëzit” vendosi në të njëjtin vend një instalacion lulesh në formën e Lules së Srebrenicës, së bashku me mbishkrimin: “Srebrenica 8.372 – Njerëzit Kujtojnë Njerëzit”.
Edhe
Srebrenica s’e harron gjenocidin
Përfaqësuesit e koalicionit u kanë bërë thirrje institucioneve të Serbisë që 11 korrikun ta përfshijnë në kalendarin zyrtar të datave përkujtimore, duke theksuar se kjo do të ishte një kontribut për ndërtimin e një paqeje të qëndrueshme përmes kultivimit të kulturës së kujtesës, të bazuar në fakte.
Sot janë bërë 31 vjet nga krimi më mizor në Evropë, ku forcat serbe të Bosnjës vranë të paktën 8.372 burra dhe djem boshnjakë.
-
“Pa të vërtetën nuk mund të ketë drejtësi e as paqe”, Kosova përkujton viktimat e Srebrenicës
-
31 vjet nga gjenocidi në Srebrenicë, mbi 1000 persona mbeten ende të zhdukur
-
BE-ja kërkon të mos mohohet gjenocidi në Srebrenicë, por nuk ndëshkon ata që e mohojnë
-
KiE e përshkruan sulmin në Banjskë si “përleshje”, kritikohet nga Kosova dhe Britania