Në Prishtinë u festua e argjendta e Distria Krasniqit

Qindra qytetarë të Kosovës të mbledhur të dielën pasdite në sheshin “Zahir Pajzaiti” të Prishtinës i dhanë përkrahje xhudistes Distria Krasniqi, e cila fitoi medaljen e argjendtë në Lojërat Olimpike që po mbahen në Paris.

Të mbledhur afër ekranit të madh të vendosur nga Komiteti Olimpik i Kosovës në sheshin “Zahir Pajzaiti” në Prishtinë, duartrokitën suksesin e xhudistes nga Peja.

Krasniqi siguroi medaljen e dytë olimpike për Kosovën në Paris. Pas të artës në “Tokio 2020”, Krasniqi e kategorisë deri 52 kilogramë fitoi të argjendtën në Paris.

Në finale të kategorisë deri në 52 kilogramë, Distria u mposht nga bartësja e parë, uzbekja Diyora Keldiyorova.

“Dëshira e saj, por edhe e jona ishte medalja e artë. Por edhe e argjendta është sukses i madh”, tha Bedri Krasniqi, qytetar i Kosovës.

Edhe Luftarake 15 shk 2026 Shifrat e konfirmojnë: Distria, më e mira e huaj në histori të garës së Parisit

Qytetari 60-vjeçar ishte prej qindra të tjerë që ishin ndalur për ta përcjellë finalen e kategorisë deri në 52 kilogramë në xhudo.

Thirrjet “Kosova, Kosova” dhe “Përpara Distria” dëgjoheshin herë pas here kur xhudistja e udhëhequr nga kryemjeshtri Driton Kuka përfundonte aksion përballë kundërshtares nga Uzbekistani.

Luftën finale nga afër e përcolli edhe ish-futbollisti i Kosovës, Enis Alushi.

“Është arritje shumë e madhe për ne, për gjithë Kosovën. Ajo duhet të jetë krenare. Ne jemi krenarë me arritjen e saj, e cila na ka përfaqësuar në mënyrën më të mirë. Mendoj se do të na bashkohen edhe medalje të tjera”, ka thënë Alushi.

Alushi ishte nën shoqërimin e drejtorit të ri të Sportit në Komunën e Prishtinës, Kushtrim Mushica.

“E argjendtë me shkëlqim ari. Është medalja e parë në këtë Olimpiadë. Edhe Distria kishte dëshirë ta fitonte të artën, por si ajo ashtu edhe ne duhet të jemi krenarë për këtë arritje. Është arritje e madhe për të gjithë. Ishte kënaqësi që së bashku me Enisin përkrahëm sportistët tanë. Besoj fuqishëm që do të kemi gëzime të tjera në ditët e ardhshme”, ka thënë Mushica.

Edhe Luftarake 10 shk 2026 Distria tregon pse iu gëzua më së shumti medaljes së fundit në Paris

Kishte edhe zyrtarë të Komitetit Olimpik të Kosovës që po ashtu iu gëzuan suksesit të radhës të Kosovës në Lojërat Olimpike.

Turma e njerëzve të mbledhur në sheshin “Zahir Pajaziti” u shpërnda me të përfunduar finalja. Me shumë gjasë qindra të tjerë do të jenë edhe të hënën në përkrahje të dy xhudistëve tjerë të Kosovës, Nora e Akil Gjakovës. Tjera medalje priten nga sporti i xhudos. Edhe Nora e ka të artën e fituar në Tokio. Në “Rio 2016” medalje të artë fitoi edhe Majlinda Kelmendi. Kelmendi në Paris ka rolin e trajneres.