Shembje dheu në Prishtinë, ndërprehet mësimi në një shkollë

Ujësjellësi përgënjeshtron Komunën: Shembja e dheut ka shkaktuar pëlcitjen e gypit

13 May 2019 10:03
12:02

Kompania Rajonale e Ujësjellësit ,”Prishtina“ ka demantuar deklaratat e zyrtarëve të lartë të Komunës së Prishtinës se pëlcitja e gypit të ujësjellësit në lagjen e Muhaxhirëve ka shkaktuar shembjen e dheut.

Ata thonë se gypi i Ujësjellësit ka pëlcitur për shkak të shembjes së dheut.

“Më datë 13.05.2019, rreth orës 00:40 minuta, ekipet e KRU “Prishtina” kanë marrë njoftim se ka shpërthyer një tubacion i furnizimit me ujë të pijshëm në Lagjen e Muhaxhirëve afër stacionit të policisë nr.2. Ekipet teknike të KRU “Prishtina” kanë dalë menjëherë në terren dhe rreth orës 00:55 minuta kanë ndërprerë linjën e furnizimit me ujë që është linjë HDPE RC Ø 110 mm e montuar në vitin 2014”, thuhet në njoftim.

Sipas tyre, dëmtimi i kësaj linje ka ardhur si pasojë e shembjes së dheut ne gropën ndërtimore të objektit që është në fazë ndërtimi, në pjesën e poshtme të rrugicës, pasi thonë se një material i tillë siç është materiali HDPE pranon lëvizje të vogla dhe devijime deri ne 11°, por jo me shumë.

“Në orët e mëngjesit të ditës së sotme ekipet e KRU “Prishtinë” kanë dalë prapë në terren, ku prezent ka qenë drejtori Teknik, menaxheri i Mirëmbajtjes si dhe ekipet tjera”, thuhet në njoftimin e KRU “Prishtina”.

Sipas KRU "Prishtina", pas analizës së marrë nga terreni, shihet se ekzekutimi i punimeve në gropën ndërtimore të objektit poshtë rrugicës, është bërë në mënyrë jo profesionale, jashtë standardeve për ndërtim dhe mbrojtje të gropës ndërtimore.

Ata thonë se nga njoftimi që kanë marrë nga zyrtarët policor në terren, shembja e dheut në gropën ndërtimore ka filluar rreth orës 23:00, ndërsa tubi ka pëlcitur pas rreth 1 orë e 30 minuta, atëherë kur dheu i shembur e ka tërhequr tubin e ujësjellësit deri ne masën që e ka shkëputur nga lidhjet, thuhet në njoftim.

“Si përfundim, zbatimi i punës në atë gropë ndërtimore dhe mbrojtja me pilota është jashtë çdo standardi për ekzekutim punimesh dhe mbrojtje në kantier, shkak i tillë ka bërë që të kolapsoj çdo gjë, raste të tilla për fat të keq po kemi shumë shpesh, që po vazhdon si pasojë e mos respektimit të standardeve nga investitorët, dhe mos inspektimit nga organet komunale”, thuhet ndër të tjera në njoftim.

10:03

Shembje dheu në Prishtinë, ndërprehet mësimi në një shkollë

Në rrugën ‘Qamile Jaka’ në Prishtinë, mbrëmë ka filluar shembja e dheut. Dyshohet se kjo ka ndodhur për shkak të shpërthimit të një gypi të ujësjellësit.

Sipas drejtorit të Inspeksionit, Adonis Tahiri tha se sipas zyrtarëve të emergjencave shkaktar mund të jetë shpërthimi i një gypi të ujësjellësit.

"Sipas zyrtarëve të emergjencave shkaktar mund të jetë shpërthimi i një gypi të ujësjellësit, në këtë rast kompania ka leje ndërtimi, pilotat janë të vendosur", tha ai.

Në vendin e ngjarjes kanë dalur edhe zyrtarë policorë dhe departamenti i emergjencave. Derisa, përballë vendit ku ka ndodhur shembja e dheut, në të cilën kanë filluar punimet, ndodhen objekte në të cilat banojnë qytetarët.

Për shkak të shembjes së dheut është ndërprerë mësimi në shkollën fillore "Naim Frashëri".

Komentet

Filani13/05/2019 11:55

Matrapazet e udheheqin, ska cka te cuditemi se ndodhin keto gjera!

Shto koment

Të ngjashme