Arbëri

Në Ditën Botërore të Ujit bëhet thirrje që ai të kursehet

Foto: Koha / ilustrim

Gjatë ditës së nesërme do të shënohet Dita Botërore e Ujit, e cila ka për qëllim të tërheqë sa më shumë vëmendje për kujdesin ndaj ujit të pijshëm dhe me qëllim të apelimit të të gjithë qytetarëve që të ndihmojnë me administrimin dhe menaxhimin e burimeve të ujit.

Kjo ditë festohet me 22 mars, ndërsa Dita e parë botërore e ujit është shënuar më 22 mars 1993.

KRUP “Prishtina”, përmes një njoftimi thotë se për çdo vit në Ditën botërore të ujit theksohen aspektet specifike të ujit për pije, siç janë: uji për qytete, cilësia e ujit, ujërat ndërkufitare, uji dhe kultura, etj.

Motoja e Ditës Botërore të Ujit për këtë vit, në Republikën e Kosovës, gjegjësisht moto që del edhe nga KRUP është: “ Ujë për të gjithë ”. Me rastin e shënimit të kësaj dite të veçantë do të ketë aktivitete nga institucionet përkatëse.

“Po afrohet koha kur kërkesa për ujë do të tejkalojë furnizimin”, thuhet në njoftim.

Rekomandimet e para të rëndësishme mbi problemet e lidhura me ujin dhe pasurive ujore janë formuluar në Konferencën e Kombeve të Bashkuara për ujin, e cila u mbajt në vitin 1997 në Mar Del Plata (Argjentinë). Pas Konferencës së Kombeve të Bashkuara për Mjedisin dhe Zhvillimin në Rio de Janeiro, Asambleja e Përgjithshme e OKB-së me rezolutën e 22 shkurt 1993, vendosi që 22 marsi çdo vit të shënohet si Dita Botërore e Ujit, me kusht që në mbarë botën të tërhiqet vëmendja mbi të gjitha problemet që lidhen direkt me ujin dhe pasuritë ujore dhe se çdo vit të festohet me moto të ndryshme.

“Roli i ujit është thelbësor për të gjitha qeniet e gjalla dhe planetin. Ai na nevojitet për pije, shtëpi e kopshte, por e rëndësishme është që ta kuptojmë domethënien e përdorimit jo të drejtpërdrejt të ujit si për prodhim, furnizim dhe zhvillim. Uji, sot nuk duhet të shfrytëzohet në mënyrë të pakontrolluar, sepse i zvogëlojmë rezervat, andaj uji duhet kursyer pikë për pikë! Ujin mund ta zëvendësojë vetëm uji! E ardhmja varet nga disa veprime që ne i marrim sot! Uji është gjëja më e çmueshme e planetit tonë! Uji është një kusht themelor për zhvillimin e qëndrueshëm! Së bashku për një cilësi më të mirë të ujit! Ujë për të gjithë!”, thuhet në komunikatën e KRUP.

Meqenëse të gjithë jemi përdorues të ujit, thuhet tutje, në të njëjtën kohë jemi edhe përgjegjës për mbrojtjen e tij, andaj dy parimet bazë për mirëmbajtjen e burimeve ujore janë Ruajtja dhe Mbrojtja!