Personat, të cilët kanë qenë të vaksinuar kundër gripit, preken më rrallë nga COVID-19 dhe priren që të sëmuren më lehtë. A është kjo për shkak se personat e vaksinuar janë më të kujdesshëm apo ekzistojnë shpjegime mjekësore për një gjë të tillë?
A ofron vaksinimi kundër gripit ndonjë mbrojtje ndaj COVID-19? Nëse po, pse?
Këto janë pyetje që profesionistët shëndetësorë janë duke i shtruar, pasi që një ekip mjekësh, i prirë nga Anna Conlon prej Universitetit të Michiganit, ka ardhur deri në disa konstatime interesante me rastin e një studimi të fundit, të publikuar në revistën “American Journal of Infection Control”.
Mjekët me këtë rast i kanë kontrolluar të dhënat shëndetësore të 27.201 banorëve të Michiganit, të cilët i janë nënshtruar testimit për COVID-19 para 15 korrikut të 2020-s. Nga mesi i tyre, 12.997 ishin vaksinuar më herët kundër gripit sezonal.
Studimi ka treguar se proporcioni i personave të vaksinuar kundër gripit, të cilët janë infektuar me koronavirus ishte dukshëm më i ulët sesa në mesin e atyre që më herët nuk ishin vaksinuar, 4 për qind krahasuar me 4.9 për qind. Pos kësaj, pacientët e vaksinuar kanë shfaqur tendenca më të pakta për të kërkuar hospitalizim apo trajtim me ventilator shkaku i infeksionit me koronavirus, dhe qëndrimet e tyre në spital ishin mesatarisht më të shkurtra.
Megjithëkëtë, nuk ekzistonte ndonjë dallim i theksueshëm në shkallën e mortalitetit midis dy grupeve krahasimore.
Edhe
Vaksina kundër COVID-19 mund të ulë numrin e vdekjeve nga problemet e zemrës
Cili është ndikimi?
Pyetja vendimtare për mjekët është nëse ekziston ndonjë shpjegim mjekësor apo mikrobiologjik për këto rezultate. Fjala me këtë rast mund të jetë, për shembull, te mbrojtja e lindur imunitare, e cila mbase është aktivizuar nëpërmjet vaksinimit kundër gripit. Mbrojtja imunitare funksionon në mënyrë të pavarur prej imunitetit të mësuar të antitrupave, të cilët fillimisht e marrin në shënjestër proteinën karakteristike majë kur e luftojnë COVID-19, kësisoj dhe e bëjnë virusin të padëmshëm.
Për dallim prej kësaj, mbrojtja e lindur imunitare, e cila mund të stimulohet nga vaksinimi, konsiston me një numër elementesh të ndryshme që reagojnë përgjithësisht ndaj infeksioneve, jo ndonjë virusi specifik. Kjo ushtri në pritje e mbrojtjes imunitare përfshinë, për shembull, fagocitet dhe qelizat e degëzuara (qeliza këto të cilat i gëlltisin grimcat e dëmshme të huaja), por edhe citokinat e ndryshme (proteina këto që luajnë rol në reagimin imunitar dhe në proceset inflamatore), si dhe leukocitet T dhe B (qelizat e bardha të gjakut).
Disa vaksinime janë përgjithësisht të mira për aktivizimin e mbrojtjes imunitare, siç është rasti, për shembull, te personat e vaksinuar kundër fruthit. Studimet epidemiologjike kanë treguar vite më parë se fëmijët e vaksinuar kanë ende imunitet më të fortë karshi një mori patogjenësh dhe atë për një kohë bukur të gjatë që pas vaksinimit, sesa në mesin e fëmijëve të pavaksinuar.
Korrelacioni?
Është gjithashtu e mundshme që një numër më i paktë i personave të vaksinuar ndaj grupit janë prekur nga COVID-19 thjeshtë për shkak se ata ishin më të kujdesshëm sesa personat e pavaksinuar. Më shumë persona nga mesi i grupeve më të rrezikuara, si të moshuarit dhe personat me sëmundje të tjera shoqëruese, rëndom vaksinohen më shpesh kundër grupit sesa të rinjtë dhe të shëndetshmit.
Në Shtetet e Bashkuara të Amerikës, për shembull, shumë të moshuar dhe të pensionuar janë izoluar vullnetarisht në fillim të vitit të shkuar, derisa të tjerët ende dalin jashtë.
Edhe
A janë më të mbrojtur nga ftohjet personat që kanë qenë të infektuar me COVID-19?
Sidoqoftë, ekzistojnë dy indikacione kundër një korrelacioni të tillë: Të moshuarit rëndom shfaqin rrjedhë më të rëndë të sëmundjes COVID-19, i cili nuk ka qenë rasti mes atyre që ishin vaksinuar kundër gripit dhe të përfshirë në studimin e Michiganit.
Studimi i vitit të shkuar, i cili ende nuk i është nënshtruar rishikimit, aludon gjithashtu për një shpjegim më imunologjik. Në mesin e nëpunësve të një spitali holandez, të cilët kanë marrë vaksinën kundër grupit para sezonit të gripit 2019-2020, rastet me COVID-19 janë shfaqur dukshëm më rrallë sesa në mesin e tyre që nuk ishin vaksinuar. Dhe nuk kishte të moshuar mbi 70 vjeç në asnjërin prej këtyre dy grupeve. \ DW
