Peptidet në lëkurën tonë mund të jenë thelbësore për t’i luftuar superbakteret

Një nga skenarët më të mundshëm (dhe shpesh të anashkaluar) do të jetë dita e ngritjes së superbaktereve, bakteret që janë rezistente ndaj antibiotikëve. Por tani, shkencëtarët e kanë gjetur një trajtim të ri të mundshëm - dhe ai fshihej në lëkurën tonë gjatë gjithë kohës.

Trupat tanë tashmë e bëjnë një punë mjaft të mirë për t’i luftuar bakteret e rrezikshme. Sistemi imunitar i përcjell me vigjilencë patogjenët pushtues, por nuk mund të fitojë çdo herë. Kështu që hulumtuesit e Institute for Stem Cell Science and Regenerative Medicine (InStem) dhe Unilever e kanë gjetur një mënyrë për ta rritur këtë aktivitet imunitar.

Sistemi imunitar e aktivizon mbrojtjen e tij edhe para se bakteret të futen brenda trupit. Qelizat e lëkurës prodhojnë molekula të quajtura peptide antimikrobike (AMP - antimicrobial peptides), të cilat siç sugjeron emërtimi i tyre i shkatërrojnë mikrobet përpara se të shkaktojnë sëmundje, shkruan Koha Ditore. Ato veprojnë kundër baktereve, viruseve, mykut dhe kërpudhave, dhe ajo që është më e rëndësishmja, këto peptide janë komplekse dhe shënjestrojnë disa pjesë të ndryshme të pushtuesve, kështu që është më e vështirë për to të zhvillojnë rezistencë.

Hulumtuesit në studimin e ri hulumtuan se çfarë e rregullon këtë proces, dhe e gjetën një mënyrë për ta përmirësuar atë. Normalisht, AMP-të prodhohen kur mikrobet vijnë në kontakt me qelizat e lëkurës, ndërsa ekipi zbuloi se kjo ndodh për shkak të niveleve më të ulëta të një proteine të quajtur kaspaza-8. Molekulat gjithashtu duket se e luajnë një rol në përshpejtimin e shërimit të plagëve.

Kur i përdorën teknikat molekulare për t’i ulur artificialisht nivelet e kaspazës-8, hulumtuesit zbuluan se më shumë AMP u liruan nga qelizat e lëkurës. Marrja nën kontroll e këtij mekanizmi mund të çojë në ilaçe të reja që e parandalojnë ndikimin e infeksioneve, gjë që është veçanërisht e dobishme për njerëzit me sistem të dobësuar imunitar.

Kjo armë e re potenciale në arsenalin tonë antibiotik mund të tingëllojë premtuese, por nuk është pa pengesat e veta të mundshme. Nëse bakteret janë të njohura për një gjë, atëherë kjo është aftësia e tyre për t’i kapërcyer pengesat që i vendosim në rrugën e tyre - fundja, kështu jemi futur në këtë rrëmujë të superbaktereve. Shkencëtarët e tjerë kanë paralajmëruar se duke luajtur me AMP-të mund t'i ketë shtyrë ato të zhvillojnë rezistencë ndaj mbrojtjes sonë natyrale imunitare edhe më shpejt. Dhe kjo mund të jetë shumë më e keqe se rezistenca ndaj ilaçeve.

Edhe Lifestyle 24 jan 2026 Rezistenca ndaj antibiotikëve rrezikon mjekësinë moderne

Por për ta parandaluar një të ardhme të mundshme, ku 10 milionë njerëz vriten nga superbakteret çdo vit, është e rëndësishme të hulumtohen të gjitha opsionet. AMP-të mund të përfundojnë si një mjet nga shumë sosh në dispozicionin tonë, dhe për fat të mirë nuk është e vetmja në zhvillim. Të tjerat përfshijnë drita, xhel, materiale, mikrobe të tjera grabitqare dhe natyrisht, antibiotikët e rinj.

Hulumtimi u publikua në revistën “Cell Reports”.