Një në tre foshnja të diagnostikuara me alergji ndaj kikirikëve mund të mos e ketë këtë problem

Më shumë se një e treta e foshnjave të diagnostikuara me alergji ndaj kikirikëve mund të mos e kenë në të vërtetë këtë problem shëndetësor, zbulon një studim i ri në Australi, ka shkruar revista People.

Në studim, të realizuar nga Instituti i Kërkimeve për Shëndetin e Fëmijëve Murdoch (MCRI) dhe Qendra Kombëtare e Ekselencës për Alergjitë (NACE), u përfshinë 778 fëmijë nën moshën 18 muajshe, të cilët më parë ishin diagnostikuar me këtë alergji.

Fëmijëve iu dhanë sasi gjithnjë e më të mëdha kikirikësh në kushte të kontrolluara spitalore, për të parë nëse organizmi i tyre shfaqte reaksion alergjik.

Rezultatet treguan se 65 për qind e tyre patën një reagim alergjik, ndërsa 35 për qind nuk shfaqën asnjë reagim. Kjo do të thotë se më shumë se një në tre prej tyre nuk e kishin alergjinë dhe diagnoza e tyre u hoq.

Sipas doktorit Tim Brettig, studiues në MCRI dhe drejtues mjekësor i programit ADAPT, konfirmimi i hershëm i diagnozës është shumë i rëndësishëm.

“Identifikimi i këtyre fëmijëve që në moshë të hershme u mundëson të shmangin një diagnozë të panevojshme të alergjisë dhe barrën e shmangies së kikirikëve”, ka shpjeguar ai.

Rasti i fëmijës që u diagnostikua në moshën pesë muajshe

Një nga rastet e përmendura në studim është ai i vogëlushit Arthur, i cili u diagnostikua me alergji ndaj kikirikëve kur ishte vetëm pesë muajsh.

Pasi iu nënshtrua testimit të mbikëqyrur nga mjekët, foshnja nuk shfaqi asnjë reaksion alergjik dhe diagnoza iu hoq.

Nëna e tij, Leah, ka treguar se familja kishte qenë e shqetësuar para testimit, pasi nuk e dinte se si do të reagonte fëmija.

“Është një lehtësim i madh të dimë se Arthur mund t’i tolerojë kikirikët dhe se mund të vazhdojmë përpara pa pasigurinë që sillte dyshimi për alergji”, u shpreh ajo.

Ndërkohë, foshnjat që rezultuan vërtet alergjike u përfshinë në një program imunoterapie, i cili synon të rrisë gradualisht tolerancën e organizmit ndaj kikirikëve përmes dozave të vogla ditore, nën mbikëqyrje mjekësore.

Profesoresha Kirsten Perrett, drejtuese e grupit kërkimor në MCRI, ka theksuar se testimi i kontrolluar duhet të merret në konsideratë përpara se një foshnje të nisë këtë trajtim.

“Testimi i ushqimit nën mbikëqyrjen e mjekëve duhet të merret parasysh në mënyrë rutinore për të konfirmuar diagnozën përpara fillimit të imunoterapisë”, ka deklaruar ajo.

Kur duhet të futen kikirikët në ushqimin e foshnjave?

Sipas Kolegjit Amerikan të Alergjisë, Astmës dhe Imunologjisë, përfshirja e hershme e ushqimeve që përmbajnë kikirikë në dietën e foshnjave mund të ndihmojë në uljen e rrezikut të zhvillimit të alergjisë.

Ndryshe nga këshillat e mëparshme, të cilat rekomandonin shtyrjen e konsumimit të kikirikëve, udhëzimet aktuale sugjerojnë që ushqimet e përshtatshme për moshën, që përmbajnë kikirikë, të fillojnë të përfshihen rreth moshës 4 deri në 6 muaj, në varësi të zhvillimit të foshnjës.

Megjithatë, prindërit duhet të këshillohen me pediatrin përpara se t’i përfshijnë këto ushqime në dietën e fëmijës, veçanërisht në rastet kur ekziston dyshimi për alergji.

Kikirikët e plotë nuk duhet t’u jepen foshnjave për shkak të rrezikut të ngufatjes. Gjithashtu, testimi me ushqim duhet të kryhet vetëm në kushte të kontrolluara mjekësore dhe jo në shtëpi.