Maria Grazia Chiuri bëhet drejtoreshë kreative e brendit “Fendi”

Disenjatorja e njohur e modës, Maria Grazia Chiuri, është rikthyer në brendin romak, “Fendi”, këtë herë si drejtoreshë kreative e shtëpisë së njohur të modës.

Ajo do ta prezantojë koleksionin e parë për vjeshtë/dimër 2026 gjatë Javës së Modës në Milano, në muajin shkurt të vitit të ardhshëm.

Vogue ka raportuar se ky emërim vjen gjashtë muaj pas largimit të saj nga brendi i mirënjohur “Dior” dhe shënon një kthim “në shtëpi”, pasi Chiuri, kishte punuar në “Fendi” për 10 vjet, nga viti 1989 deri më 1999, si disenjatorë e aksesorëve. Pikërisht aty ajo krijoi një nga simbolet më të njohura të markës, çantën e ashtuquajtur “Baguette”.

“Maria Grazia Chiuri është një nga talentet më të mëdha kreative në botën e modës sot, dhe jam i lumtur që ajo ka zgjedhur të kthehet në ‘Fendi’ për të vazhduar të shprehë kreativitetin e saj brenda grupit LVMH. Jam i bindur se Maria Grazia do të kontribuojë në rilindjen artistike dhe suksesin e ardhshëm të shtëpisë, duke ruajtur trashëgiminë e saj unike”, ka thënë Bernard Arnault, kryetar dhe drejtor ekzekutiv i LVMH Group.

Pas largimit të Kim Jones në muajin tetor 2024, Fendi kishte mbetur pa drejtor të përhershëm për veshjet e grave. Deri tani, Silvia Venturini Fendi, mbesa e themeluesve Adele dhe Edoardo Fendi, pati marrë përsipër edhe drejtimin e linjës së grave, përveç asaj të burrave. Por më 29 shtator ajo u promovua në një rol të ri si presidente nderi.

“Jam i lumtur që e mirëpres Maria Grazia-n në ekip. Roli i një drejtori kreativ sot nuk është më thjesht të dizajnojë rroba të bukura, por të krijojë një kulturë dhe të reflektojë botën ku jetojmë. Talenti dhe vizioni i saj do të jenë thelbësorë për forcimin e trashëgimisë së ‘Fendit’ dhe zhvillimin e gjeneratës së re të talenteve”, ka deklaruar Ramon Ros, kryetar dhe CEO i “Fendit”.

Chiuri e përshkroi rikthimin e saj si një moment personal e profesional shumë të rëndësishëm.

“Unë kthehem në Fendi me nder dhe gëzim, pasi pata privilegjin të filloja karrierën time nën udhëheqjen e themelueseve të shtëpisë, pesë motrave Fendi. Kjo shtëpi ka qenë gjithmonë një vatër e talenteve dhe një pikënisje për shumë krijues në industri. Jam mirënjohëse ndaj z. Arnault që më ka besuar detyrën për të shkruar një kapitull të ri në historinë e këtij brendi të jashtëzakonshëm që u themelua nga gratë”, ka  thënë ajo.

Përveç aspektit profesional, ky rikthim është i përshtatshëm edhe nga ana personale, pasi “Fendi” ka selinë në Romë, aty ku Chiuri është zhvendosur pas largimit nga “Dior”, që ka seli në Paris.

Kohët e fundit ajo ka punuar në projekte që i ka pasion, përfshirë restaurimin e Teatro Della Cometa, një hapësirë historike për shfaqje në kryeqytetin italian.

Karriera e saj ka qenë e lidhur ngushtë me modën italiane, pas “Fendit”, Chiuri dhe bashkëpunëtori i saj Pierpaolo Piccioli kaluan në brendin tjetër të mirënjohur “Valentino”, ku u bënë drejtorë kreativë të përbashkët në vitin 2008.

Në vitin 2016 ajo kaloi te “Dior”, ku u bë gruaja e parë që drejtoi linjën e veshjeve të grave në historinë e shtëpisë franceze.

Në “Dior”, Chiuri vendosi një ton të ri, duke e lidhur modën me mesazhe feministe, diçka që u pa qartë në koleksionin e saj të parë me bluzat “We should all be feminists”.

Ajo bashkëpunoi me artiste si Judy Chicago, Faith Ringgold dhe Mickalene Thomas, duke zgjeruar horizontin kulturor të markës.

Sipas të dhënave të HSBC, shitjet e “Dior” u rritën nga 2.2 miliardë euro në vitin 2017 në 9.5 miliardë euro në vitin 2023, një periudhë që përkon me drejtimin e saj.