Gratë jetojnë mesatarisht më gjatë se burrat. Në të gjithë botën, gratë priren të jetojnë 5.1 vjet më shumë se burrat. Në një hartë me të dhënat e mbledhura nga “Global Data Lab” dhe “Eurostati”, Kosova qëndron ndër vendet evropiane me dallimin më të vogël në jetëgjatësinë mes grave dhe burrave.
Siç shihet në hartën e përpiluar nga “Landgeist”, Kosova është në listën e shteteve ku gratë jetojnë mesatarisht katër vjet më shumë se burrat. E njëjta shkallë vlen edhe për Shqipërinë.
Evropa konsiderohet kontinenti më interesant sa i përket dallimit në moshë mes grave dhe burrave. Në shumicën e vendeve të Evropës, jetëgjatësia varijon prej 2 deri 8 vjet më shumë te gratë se te burrat. gjithsesi, sa më shumë që shkohet kah lindja dallimi rritet.
Në Ukrainë, Bjellorusi dhe Rusi kjo është në shumë më e theksuar. Aty gratë jetojnë deri 10 vjet më shumë se burrat.
Dallimi më i vogël në jetëgjatësi është në Islandë, Norvegji, Danimarkë, Suedi dhe Holandë.
