Ka diçka jashtë kësaj bote te Bryan Johnsoni. Lëkura e tij është e shndritshme dhe e tendosur, sytë e tij janë të ndritshëm në mënyrë të panatyrshme, ndërsa ai shikon me vëmendje.
Kërkoj për një rrudhë, njollë apo të metë në fytyrën e tij, por nuk ka asnjë. E pabesueshme, por kjo përsosmëri nuk vjen nga botoksi, mbushjet apo nga aftësia e një kirurgu, shkruan “Daily Mail”.
Në moshën 45-vjeçar, Bryan, një manjat i teknologjisë që shiti biznesin e vetë Braintree Venmo te PayPal për 800 milionë dollarë gati dhjetë vjet më parë, po shpenzon nga 2 milionë dollarë në vit në kërkimin e rinisë së pëhershme, në projektin e quajtur “Project Blueprint”.
Ai ka një ekip prej më tepër se 30 mjekëve që në mënyrë rutinore ia kontrollojnë gjakun, zemrën, mëlçinë, veshkat, trurin, enët e gjakut dhe shëndetin seksual.
Ai pi gati 80 vitamina e minerale në ditë, ha mbi 30 kilogramë perime të freskëta në muaj dhe bjen në shtrat çdo natë në ora 20:30.
Synimi i Bryanit është që biologjikisht të kthehet në moshën 18-vjeçare. Ai ha një sasi strikte prej 1977 kalori në ditë – duke përfshirë qumësht të bajameve, arra, fara të lirit dhe manaferra – ushtron të paktën një orë në ditë. Ai pretendon se dy vjet në eksperimentin e tij kundër plakjes, ka tash zemrën e një 37-vjeçari, lëkurën e një 28-vjeçari dhe fizikisht është si 18-vjeçar.
A mendon se do të jetojë përgjithmonë?
“Për momentin nuk e kam plan të vdes”, thotë ai.
Kritikët madje kanë ngritur krahasime të Bryanit me Patrick Batemanin, vrasësin serial të novelës “Amerikan Psycho” të shklruar nga Bret Eatson Ellis.
Bryan e quan veten atlet profesionist, ndërsa qesh kur njerëzit i thonë narcisist.
“Unë nuk jam ndjerë kurrë më i lumtur apo më i qëndrueshëm. Urrejtësit gjithmonë do të urrejnë, por për mua shenja e një gjeniu është goditja në shënjestrën që nuk mund të shohin tjerët”, thotë Bryan nga vila e tij 9 milionë funtëshe në Kaliforni.
Bryan bëri bujë botërore muajin e kaluar në “një shkëmbim të plazmës së gjakut mes gjeneratave”, ku djali i tij 17-vjeçar Talmage i dhuroi atij gjakun rinor, ndërsa Bryan vetë i dhuroi gjakun e tij babait 70-vjeçar.
Ideja e tij kishte rrjedhur nga testet te brejtësit, ku minjtë më në moshë u rinuan kur u mbushën me gjakun e minjve të rinj. Mirëpo, shkencëtarët asnjëherë nuk e testuan këtë te njerëzit.
Kur Bryan është pyetur nëse ndihet më i ri pasi mori rreth një litër gjak nga djali i tij, ai thotë: “Është shumë herët për të thënë këtë”.
Bryan kishte nisur kërkimin kundër plakjes kur, pasi e shiti kompaninë dhe kaloi në një divorc të rëndë nga bashkëshortja e tij, gjeti veten me 27 kilogramë mbipeshë. Ai ishte në depresion dhe filloi të mendonte për vetëvrasje.
“Më u deshën vite për të hequr demonin e brendshëm”, tregon Bryan.
Një mjek i njohur amerikan për sëmundjet e kancerit, që ka preferuar të flasë në kushte anonimiteti, ka thënë: “Këta miliarderë po shpenzojnë paratë e tyre për të testuar gjërat që janë teori. Sigurisht, shumë prej tyre janë çmenduri. Por, Bryan nuk po e lëndon askënd. Njerëzit si ai mund të përfundojnë duke gjetur ilaçe për sëmundje – zgjidhje të vërteta të një problemi të vërtetë shëndetësor. Po të kishim 800 milionë dollarë, edhe ne do të donim të jetonim përgjithmonë”.
