Një luan i njohur si mbreti i Serengetit është vrarë nga rivalët e tij.
Operatorët turistikë dhe vizitorët e parkut kombëtar e kanë përkujtuar Bob Juniorin “legjendar” – të njohur edhe si Snyggve.
“Kafsha më e mirë” dhe “më fotogjenike” në Serengeti, Bobi kishte reputacion si i frikshëm në mesin e rivalëve dhe ka sunduar për shtatë vjet me ndihmën e vëllait të tij, Tryggve.
Rivalët më të vegjël besohet se e vranë.
“Ata deshën që ta rrëzonin Bob Juniorin”, ka thënë oficeri Shirima për BBC.
“Këto ngjarje ndodhin zakonisht kur kreu i një tufe plaket ose nganjëherë kur luanët e tjerë meshkuj nuk janë të lumtur me kontrollin e tij mbi një territor të madh”.
Besohet se edhe vëllai i Bob Juniorit është vrarë nga të njëjtët. Shirima tha se të dy u vranë në sulme të ndara por siç dukej, të koordinuara.
Serengeti në Tanzani është shtëpia e rreth 3,000 luanëve dhe vizitohet nga banorë dhe të huaj.
