Deri tani janë të punësuara dy shofere, të cilat ngasin të vetmen veturë që kanë.
Gjatë një dite në orarin e tyre të punës ato ndërrojnë rolet. Njëra pranon thirrjet e klienteve e tjetra niset nga qendra për t’i marrë e dërguar ato në destinacionin përkatës.
Kjo është Radiotaksia “Hareja” me qendër në Rahovec, që bart vetëm pasagjeret gra, raporton emisioni SOT në KTV.
Fitore Muharemi ka disa muaj e punësuar në Radiotaksinë “Hareja” e deri tani thotë të ketë një përvojë të veçantë.
Ideja dhe qëllimi me të cilin është krijuar kjo linjë taksie, është mirëpritur edhe prej njërës nga pasagjeret e rregullta.
Me të përfunduar njërën nga porositë e marra e destinimin e klientes, Fitores i duhet ta kthejë veturën përballë qendrës, aty ku edhe nis puna e saj.
Kjo linjë taksie është hapur nga Shoqata “Hareja”, që nga marsi i vitit të kaluar.
Së bashku me shumë aktivitete të tjera brenda kësaj shoqate, sipas drejtoreshës Adelina Paçarizi, kjo radiotaksi u krijua për t’i trajtuar fëmijët me nevoja të veçanta, por aty përfshihen edhe fëmijët që dërgohen për kujdes ditor.