Zelanda e Re ka zbuluar një plan për të taksuar fermerët për gogësimat e lopëve dhe bagëtive të tjera, në një përpjekje për të trajtuar një nga burimet më të mëdha të vendit të gazeve serrë, shkruan BBC.

Nëse miratohet një nismë e tillë, Zelanda e Re do të bëhet vendi i parë që takson fermerët për emetimet e metanit që lëshohen nga kafshët.

Në Zelanda të Re jetojnë mbi pesë milionë njerëz, së bashku me rreth 36 milionë bagëti.

Pothuajse gjysma e totalit të emetimeve të gazeve serrë në vend vijnë nga bujqësia, kryesisht metani.

“Nuk ka dyshim se ne kemi nevojë të zvogëlojmë sasinë e metanit që po hedhim në atmosferë dhe një sistem efektiv për të paguar emetimet për bujqësinë do të luajë një rol kyç në mënyrën se si ta arrijmë këtë”, ka thënë ministri i Ndryshimeve Klimatike të Zelandës së Re, James Shaw.

Sipas propozimit, fermerët do të duhet të paguajnë për emetimet e gazit që vijnë nga bagëtitë e tyre nga viti 2025.

Plani përfshin gjithashtu stimuj për fermerët që reduktojnë emetimet përmes aditivëve të ushqimit, ndërsa mbjellja e pemëve në ferma mund të përdoret për të kompensuar emetimet.

Metani është gazi i dytë më i zakonshëm serrë pas dioksidit të karbonit (CO2).

Është një nga më të fuqishmit dhe përgjegjës për një të tretën e ngrohjes aktuale nga aktivitetet njerëzore. Molekulat individuale të metanit kanë një efekt ngrohjeje më të fuqishme në atmosferë sesa molekulat e vetme të CO2.

Në konferencën mjedisore COP26 të vitit të kaluar në Glasgow, SHBA-ja dhe BE-ja ranë dakord të ulin emetimet e gazit me 30% deri në vitin 2030. Më shumë se 100 vende, duke përfshirë Zelandën e Re, kanë nënshkruar gjithashtu nismën.