Historiani natyralist, Sir David Attenborough, ka debutuar në Instagram në mënyrë të jashtëzakonshme.
94 vjeçari ka vendosur rekord duke arritur më së shpejti 1 milion ndjekës, shkruan Guinness World Records.
Attenborough postoi një video rreth orës 02:00, për shqetësimet e tij rreth ngrohjes globale dhe llogaria e tij arriti mbi një milion ndjekës për më tepër se katër orë, saktësisht në ora 06:44, derisa video kishte më shumë se dy milionë klikime, transmeton KOHA.
“Mediat sociale nuk janë habitati i zakonshëm i Davidit, prandaj derisa ka incizuar këtë mesazh vetëm për Instagram, si ky në postim, ne po e ndihmojmë ta mbajë llogarinë”, shprehen Collin Butfield dhe Johnnie Hughes, të cilët e mbajnë llogarinë e tij.
Collin dhe Johnnie kanë punuar me Attenborough në dokumentarin e ri të Netflixit “A Life On Our Planet”.
Attenborough ka një paralajmërim për rrezikun që po i kanoset botës.
“Jam paraqitur në televizion dhe radio në 60 vitet e kaluara, por kjo është hera ime e parë në Instagram”, shprehet Attenborough. “Siç e dimë të gjithë, bota është në telashe. Kontinentet janë duke u djegur. Akullnajat po shkrihen, koralet po vdesin. Peshqit po zhduken nga oqeanet tona. Lista vazhdon”.
Rekordin e më parshëm e mbante ylli i “Friends”, Jennifer Aniston, e cila i ishte bashkuar Instagramit më 15 tetor 2019 dhe kishte arritur 1 milion ndjekës për pesë orë e 16 minuta.
