Supremja e hedh poshtë ankesën e LVV-së për certifikimin e Listës Serbe

Gjykata Supreme e ka hedhur poshtë ankesën e Lëvizjes Vetëvendosje kundër vendimit të PZAP-së për ta urdhëruar KQZ-në që ta certifikojë Listën Serbe për pjesëmarrje në zgjedhjet lokale. Në arsyetimin e vendimit, Supremja konstatoi se Sami Kurteshi dhe Alban Krasniqi, si dy anëtarë individualë të KQZ-së, nuk kanë legjitimitet të ankohen kundër vendimit të PZAP-së, pasi nuk janë palë të drejtpërdrejta

Përpjekja e Lëvizjes Vetëvendosje për ta bllokuar pjesëmarrjen e Listës Serbe në zgjedhjet lokale të 12 tetorit nuk ka marrë aprovim nga Gjykata Supreme.

Kjo gjykatë e ka hedhur poshtë të premten ankesën, të cilin subjekti e ka deponuar kundër vendimit të Panelit Zgjedhor për Ankesa dhe Parashtresa për ta urdhëruar Komisionin Qendror të Zgjedhjeve që ta certifikojë Listën Serbe për pjesëmarrje në zgjedhje.

Supremja ka konstatuar se Sami Kurteshi e Alban Krasniqi, si anëtarë individualë të KQZ-së, nuk kanë legjitimitet për t’u ankuar kundër vendimit të PZAP-së, pasi nuk janë palë të drejtpërdrejta.

“Kjo për faktin se, sipas vlerësimit të kolegjit të kësaj gjykate, të drejtë për të paraqitur ankesë në Gjykatën Supreme ndaj vendimit të PZAP-it, përveç personave që kanë interes ligjor (të përcaktuar me paragrafin 1 të nenit 119), ka vetëm KQZ-ja, përkatësisht zyra e saj, ashtu siç është e përcaktuar me Ligjin për Zgjedhjet e Përgjithshme, përkatësisht nenin 119 paragrafi 2, e jo anëtarët individualë të saj. Për më tepër, këta të fundit e shprehin mendimin e tyre gjatë procesit të vendimmarrjes brenda KQZ-së, por nuk legjitimohen që të veprojnë si palë individuale në procedurë gjyqësore, siç është edhe rasti konkret”, thuhet në vendim të Supremes.

Sipas Supremes, Kolegji i saj nuk është lëshuar në shqyrtimin meritor të çështjes së ngritur me ankesë.

Javën e shkuar, PZAP-ja e urdhëroi KQZ-në ta certifikojë partinë më të madhe të serbëve në Kosovë, që e gëzon mbështetjen e Beogradit zyrtar, vetëm pak ditë pasi asaj iu mohua regjistrimi për të marrë pjesë në zgjedhjet e 12 tetorit.

Dy anëtarë të Vetëvendosjes në KQZ, Sami Kurteshi e Alban Krasniqi, kanë qenë të vetmit që votuan kundër certifikimit të këtij subjekti politik.

Vendimi për moscertifikimin e Listës Serbe është kritikuar nga vendet e QUINT-it dhe nga Bashkimi Evropian, të cilët u bënë thirrje Qeverisë në detyrë dhe partive politike që të mos ndërmarrin hapa për ta penguar regjistrimin e kësaj partie.

Lista Serbe i pati bojkotuar zgjedhjet e jashtëzakonshme të mbajtura në katër komunat veriore gjatë vitit 2023, e të cilat janë zhvilluar pas dorëheqjes së kryetarëve nga radhët e kësaj partie nga udhëheqja nëpër këto komuna, në nëntor të 2022-tës.

Lëvizja Vetëvendosje e pati kundërshtuar cerifikimin e Listës Serbe edhe për zgjedhjet e përgjithshme të mbajtura më 9 shkurt, duke e dërguar rastin deri në Supreme, por pa sukses.