Shkolla “Hasan Prishtina” vendos për forma tjera sindikale, në vend të grevës

Mësimdhënësit e shkollës “Hasan Prishtina” kanë vendosur që insistimin për plotësimin e kërkesave të tyre ta vazhdojnë në forma të tjera sindikale dhe jo në bojkotimin e procesit mësimor. Një numër i madh i institucioneve të arsimit parauniversitar vazhdojnë të qëndrojnë të mbyllura, për këtë prindërit e shkollës “Naim Frashëri” protestuan duke u kërkuar SBASHK-ut dhe Qeverisë që të arrijnë një marrëveshje për fillimin e mësimit.

Me katër javë vonesë, u hapën për nxënësit dyert e shkollës “Hasan Prishtina” në kryeqytet.

Stafi i kësaj shkolle ka vendosur që insistimin për plotësimin e kërkesave ta vazhdojë me forma të tjera sindikale.

Ora e mësimit në këtë shkollë do të mbahet 30 minuta, deri në arritjen e një marrëveshjeje mes Sindikatës së Bashkuar të Arsimit dhe Qeverisë.

Mësimdhënësja Shukrije Ukshini ka thënë se vendimin për ndërprerjen e grevës e kanë marr për hir të fëmijëve.

“Morëm vendim të fillojmë, jo që është e tepërt për ne, por është e tepërt si shtet, si popull, si nxënës, e ardhmja jonë janë këta, nëse e fundosim, nuk e di se çka presim, për atë morëm një vendim”, ka thënë Ukshini.

Përderisa nxënësit e shkollës “Hasan Prishtina” u kthyen në bankat shkollore, të njëjtën mundësi nuk e patën moshatarët e tyre në shkollat e tjera të kryeqytetit.

E për këtë disa prindër protestuan në oborrin e shkollës “Naim Frashëri”.

“Ne prindërit duam të dërgojmë mesazh te të gjitha palët që të bashkëbisedojnë që sa më shpejt të gjejnë një zgjidhje për të mirën e përgjithshme, por assesi duke cenuar të drejtën e fëmijëve për shkollim”, ka thënë Vlora Vokshi.

Prindërit kanë thënë se fëmijët e tyre janë duke përjetuar rëndë qëndrimin larg bankave shkollore.

“Normal, kjo është një katastrofë që është kah ndodhë, në vitet ’90 kanë qenë shkollat e hapura, tash janë mbyllur, kjo është katastrofë... Fëmija është kah e përjeton tepër, tepër keq”, ka thënë Suzana Stublla.

“Është e vështirë edhe për fëmijët, sepse kanë qenë të entuziazmuar ta fillojnë vitin shkollor, duke pasur parasysh që edhe vitin e kaluar ka filluar me vonesë për shkak të pandemisë”, ka deklaruar Hilmi Gjukaj.

Edhe pse një nga idetë e LDK-së nuk u mor parasysh nga SBASHK-u, kjo parti për të zgjidhur ngërçin në arsim tash ka kërkuar nga Qeveria që të mbajë takime në baza ditore me sindikatat deri në arritjen e një marrëveshjeje.

“Kriza është aq e thellë saqë dialogu do të duhej në baza ditore, me orë të tëra. Vetëm për të prodhuar një zgjidhje që sistemi arsimor të zhbllokohet. Ne nuk po e shohim këtë gatishmëri nga kryeministri, që është tërësisht e dëmshme”, është shprehur Jehona Lushaku nga kjo parti.

Që nga 25 gushti, kur ka filluar greva e përgjithshme, Qeveria dhe sindikatat janë takuar vetëm dy herë. Në asnjërën nga këto takime palët nuk kanë gjetur gjuhë të përbashkët.