-
Nga:
Marigona Brahimi
- 22 prill 2022 22:11
- Shpërndaje në:
Partia Demokratike e Kosovës ka ngritur kallëzim penal ndaj pesë anëtarëve të bordit të Zyrës së Rregullatorit për Energji. Kallëzimi mbështetet në mosrespektimin e vendimit të Gjykatës Themelore në Prishtinë, e cila kishte vendosur për pezullim të shtrenjtimit të energjisë elektrike. Karshi kësaj situate, PDK-ja e ka kritikuar edhe heshtjen e partisë në pushtet.
Pesë anëtarëve të bordit të Zyrës së Rregullatorit për Energji, Partia Demokratike e Kosovës u ka ngritur kallëzim penal.
Me këtë kallëzim, PDK-ja i është drejtuar Prokurorisë Speciale, dy javë pas vendimit të Gjykatës Themelore të Prishtinës për pezullim të shtrenjtimit të energjisë, vendim të cilin ZRRE-ja nuk po e respekton.
Në kallëzimin ndaj bordit numërohen 4 vepra penale: mospërfillje e Gjykatës, mosekzekutim i vendimeve gjyqësore, keqpërdorim i pozitës zyrtare dhe bashkëkryerje.
Në këtë situatë, PDK-ja e ka implikuar edhe Qeverinë.
“Kjo ngritje e çmimit ka prekur 350 mijë familje, prandaj kemi dalë në mbrojte të tyre, sepse Qeveria nuk i mbrojti dhe në vend se t'i mbrojë, doli kundër dhe ishte në sinkron të plotë me ZRRE-në, pasi mazhoranca, as në Qeveri, as në parlament, nuk e kanë ngritur zërin”, ka thënë sekretari i PDK-së, Bajrush Xhemaili.
Zyra e Rregullatorit për Energji po vlerëson se vendimi i shkallës së parë, ndonëse është masë e përkohshme, nuk mund të ekzekutohet, meqë më çështjen do të merret shkalla e dytë, apo Gjykata e Apelit.
E avokati që po e përfaqëson PDK-në në këtë rast, Faton Fetahu, e ka quajtur të papranueshëm këtë interpretim.
“Baza ligjore në të cilën thirret ZRRE-ja është e paqëndrueshme. Ata nuk e bëjnë dot të qartë dallimin mes aktgjykimit dhe aktvendimit. Në rrethanat e rastit konkret është një masë e përkohshme për shtyrjen e zbatimit të vendimit të ZRRE-së, i cili ka hyrë në fuqi ditën e pranimit në ZRRE”, ka deklaruar Faton Fetahu, avokat i PDK-së.
Vendimin për masën e përkohshme, Gjykata Themelore e ka marrë më 8 prill, dhe për ankimim të tij nga palët e interesuara, ka kohë vetëm deri të shtunën.
