-
Nga:
Majlinda Ibrahimi
- 7 shtator 2022 21:17
- Shpërndaje në:
Musli Rexhepit i është ndaluar që t’i afrohet kreut të Sindikatës së Bashkuar të Arsimit, Rrahman Jasharajt, në afërsi prej 500 metrash.
Pasi shkolla nuk i hapi dyert për mbesën e tij shkaku i grevës, 81-vjeçari ka pasur një përplasje me kryesindikalistin e mësimdhënësve, në një tubim në shkollën “Ismail Qemali” në kryeqytet. Pas kësaj, u ndalua nga Policia, por të mërkurën është liruar nga paraburgimi dhe do të mbrohet në liri nëse i përmbahet ndalesës së vendosur nga gjykata.
Ashtu siç shihet në pamje të xhiruara nga ekipi i KOHËS, pensionisti dëshironte të merrte fjalën në takimin e së hënës, por nuk iu mundësua, e pastaj situata pati përshkallëzuar.
Pas lirimit, 81-vjeçari thotë se qëllimi i tij nuk ishte të krijonte tollovi, por vetëm dëshironte të kërkonte nga kreu i SBASHK-ut që ta ndërpresë grevën në arsim.
“Qëllimi jem ka qenë dhe është me u çel shkollat, të fillojë mësimi se unë me padurim po pres që ta shoh mbesën time në bankat shkollore”, u shpreh Rexhepi.
Qëndrimi për 48 orë në paraburgim për 81-vjecarin ishte i rëndë dhe tha se më së shumti i ka munguar mbesa.
“Këta mos e përjetoftë as armiku”. “Jo, e vogël nuk kam mundur të bisedoj, pasi nuk më kanë lënë as telefon, tani me gëzim po shkoj që ta përqafoj", tha ai.
Për avokatin e tij Tomë Gashi ndalimi prej 48 orëve për të moshuarin është i pajustifikueshëm.
“Besoj që ndalimi i zotëri Rexhepit ka qenë krejtësisht i panevojshëm e le më një kërkesë për caktimin e masës së paraburgimi,t gjë që ka qenë juridikisht krejtësisht e pajustifikueshme”, pohoi Gashi.
Fillimisht incidenti u cilësua si kanosje nga Policia, ndërkaq Prokuroria ndryshoi kualifikimin juridik duke ngritur aktakuzë ndaj pensionistit, për veprën penale “cenim i të drejtës në grevë”.
Pas rastit, Rrahman Jasharaj kishte deklaruar se nuk ka pasur goditje nga i moshuari.
“Nuk kam pasur asnjë goditje, përveçqë ka tentuar të më mbajë për dore”, ka thënë Jasharaj.
Që nga 25 gushti, punonjësit e sektorit publik, të cilëve u janë bashkuar edhe mësimdhënësit, janë në grevë të përgjithshme. Sindikalistët kërkojnë 100 euro shtesë mbi pagë, deri në kohën kur të miratohet e të hyjë në fuqi Ligji për Paga.
