Mësimdhënësit kërkojnë rritje të pagave e zvogëlim të orëve të punës

Në Ditën Ndërkombëtare të Punëtorëve, mësimdhënësit mbajtën një marsh protestues e listuan një varg kërkesash drejtuar ekzekutivit. Rritja e koeficientit të pagave, zbatimi i kontratës kolektive e shkurtimi i orarit të punës ishin ndër kërkesat në protestën e organizuar nga SBASHK-u

Para objektit të Bibliotekës Kombëtare, të mërkurën, u mblodhën mësimdhënës nga e gjithë Kosova për të marshuar në sheshet e kryeqytetit deri te ndërtesa e Qeverisë, në ditën e punëtorëve – 1 Maj.

Në marshin protestues të organizuar nga Sindikata e Bashkuar e Arsimit dhe Shkencës (SBASHK) pati kërkesa për rritje të koeficientit të pagave për së paku 30 për qind, zbatimin e kontratës kolektive e që norma javore e punës të zvogëlohet në 18 orë. Aktualisht është 20 orë.

Nebi Mëziu, mësimdhënës nga Skenderaj, e shtroi nevojën që të paguhet edhe kujdestaria e klasës.

“Kujdestaria e klasës ka një angazhim të jashtëzakonshëm, mos të themi jetësor, sepse duhet kujdesur për çdo nxënës, të kontaktosh prindër, me dhjetëra e qindra herë, i thërret, nuk vijnë”, ka thënë Mëziu.

Kryetari i SBASHK-ut, Rrahman Jashari, i kërkoi Qeverisë që t’ua përmbushë kërkesat, në të kundërtën paralajmëroi veprime të tjera sindikale.

Edhe LAJMET E MBRËMJES 1 maj 2025 Rritja e pagave dhe e pensioneve, kërkesë kryesore në tri protesta për 1 Maj

Jasharaj tha se Qeveria duhet të veprojë në mënyrë që të mos përsëritet, siç tha, viti 2022, kur u mbajt grevë njëmuajshe.

“Kemi bërë shumë angazhime dhe kemi pasur gatishmëri që shqetësimet dhe kërkesat legjitime të anëtarësisë dhe pensionistëve t’i bashkëbisedojmë me Qeverinë e të angazhohemi bashkërisht për realizimin e tyre. Por, Qeveria vazhdon t’i ikë dialogut dhe prandaj duke respektuar zërin e anëtarësisë jemi këtu e në këtë protestë me apelin drejtuar Qeverisë që të realizojë kërkesat tona, për të parandaluar kështu veprime të tjera sindikale”, ka deklaruar Jasharaj.

E kryetari i Sindikatës së Punëtorëve të Sektorit Privat, Jusuf Azemi, ka thënë se kryeministri Kurti i ka gënjyer punëtorët kur ka deklaruar se do t’i rrisë pagat.

“Ne jemi në gjendje të rëndë, por tani zgjidhjen nuk po e kërkojmë te Qeveria e Kosovës, zgjidhjen po e kërkojmë te liberalizimi i vizave, me të cilën po ju betohem që nëse vazhdon kështu edhe një vit, eventualisht dy vjet, kryeministrin e Kosovës nuk ka kush ta bartë me xhipa të zi”, ka ironizuar Azemi.

Kryetari i Bashkimit të Sindikatave të Pavarura të Kosovës, Atdhe Hykolli, ka thënë se prania e tyre në protestë në masë të madhe, tregon për fuqinë që e kanë. Ai i bëri ftesë ekzekutivit që të angazhohet për dialog me sindikatat.

“Prania jonë këtu është dëshmi e besimit tonë në fuqinë e dialogut dhe angazhimit konstruktiv. Jemi mbledhur për të nxitur mirëkuptim për hapa të mëtutjeshëm. Qeverisë i bëjmë ftesë të hapur për t’u angazhuar për dialog. Kërkesat tona lindin nga një dëshirë e përbashkët për punëtorët e arsimit, sektorit privat, dhe gjithë punëtorët në Kosovë”, ka thënë Hykolli.

E kryetari i SBAShK-ut në Klinë, Arif Elezi, prezantoi kërkesat e anëtarësisë, duke kërkuar dialog social nga qeveria, konsultime para plotësimit të ligjeve, nënshkrimin e kontratës kolektive, ngritjen e vlerës së koeficientit të pagave, përmirësimin e kushteve të punës dhe të tjera.

Edhe LAJMET E MBRËMJES 4 dhj 2024 Mësimdhënësit kërkojnë nënshkrimin e Kontratës Kolektive dhe rritje pagash

“Duam dialog social për realizimin e kërkesave tona, nuk lejojmë të bëhen ndryshime të ligjeve në dëm të punëtorëve të arsimit, kërkojmë nënshkrimin e aneks-kontratës Kolektive të Arsimit sidomos për ruajtjen e vendeve të punës. Qeveri respekto pensionistët sepse ju arsimuan edhe juve, kërkojmë urgjentisht të ngrihet vlera e koeficientit të pagave për së paku 30%, kërkojmë përmirësimin e kushteve të punës në institucionet arsimore, plotësimi i ligjeve të mos bëhet pa pajtimin e sindikatave, duam funksionalizimin e Këshillit Ekonomik Social, kërkojmë që norma javore të jetë 18 orë si në shtetet e rajonit, Qeveria të sigurojë buxhet për zbatimin e Kontratës Kolektive të Arsimit pa pasur nevojë të shkohet në gjykata, kërkojmë të kemi përfaqësues të punëtorëve në komisione e borde në të cilat vendoset për çështjet jetike për punëtorët”, ka thënë ai.

1 Maji njihet si Dita Ndërkombëtare e Punës dhe është festë zyrtare edhe në Kosovë.