Liderët opozitarë kërkojnë që Qeveria të koordinohet me aleatët ndërkombëtarë

Liderët opozitarë i kanë kërkuar kryeministrit Albin Kurti që të ketë koordinim të plotë me partnerët ndërkombëtarë për situatën e krijuar në veri.

Pas takimit të zhvilluar me ftesë të kryeministrit Kurti për të diskutuar për zhvillimet e fundit, ata thanë se Kurti s’ka plan për çështjen e veriut.

Kryetari i PDK-së, Memli Krasniqi, dhe ai i LDK-së, Lumir Abdixhiku, kërkuan veprime të përgjegjshme që e ruajnë sovranitetin e vendit.

“Nuk mund të them se dola me ndonjë siguri të madhe se Qeveria e di në çfarë drejtimi është duke shkuar dhe çfarë veprimesh duhet të ndërmarrë për ta mbajtur situatën nën kontroll, sepse në fund të fundit qëllim i të gjithëve duhet të jetë mbarëvajtja e rendit publik dhe mbajtja e paqes, por me këtë rast edhe një herë ja shpreha qëndrimin e Partisë Demokratike të Kosovës, se në këtë moment Kosovës i duhen veprime të përgjegjshme”, tha Memli Krasniqi.

“Nuk kuptuam diçka më të re sesa deklarimet e kryeministrit. Nuk pamë plan për zgjidhjen e çështjes së krijuar. Nuk pamë lëvizje për koordinim të plotë me aleatët tanë. Besojmë se koordinimi me Departamentin e Shtetit dhe me institucionet, me Uashingtonin dhe Brukselin, është zgjidhja e vetme për situatën e krijuar. Kosova duhet të sigurojë paqen dhe sovranitetin në territorin e vet”, tha Lumir Abdixhiku.

Edhe Arbëri 13 maj 2024 Vetëm Krasniqi sot takon Kurtin, dy tema të diskutimit

I pakënaqur me atë çfarë ishte diskutuar, kryetari i AAK-së, Ramush Haradinaj, ka lëshuar takimin vetëm 20 minuta pas fillimit të tij. Në një postim në Facebook, ai ka thënë se u detyrua ta lëshojë takimin, pasi Kurti, sipas tij, nuk sqaronte pse i ka prishur raportet me Amerikën.

“Edhe pse isha pjesë e takimit me kryeministrin Kurti, u detyrova ta lëshoj takimin sepse Kurti mbante ligjërata e nuk na sqaronte se përse i ka prishur raportet me Amerikën dhe përse nuk po kthehet që të realizojë kërkesën e tyre. Për mua është e papranueshme që në raste kaq të ndjeshme, t’i prishim raportet me aleatin kryesor të sigurisë”, shkroi Haradinaj.

Por shefi i ekzekutivit, edhe pse pas takimit nuk u prononcua për media, në një rast tjetër tha se është në koordinim me vendet e Quint-it, NATO-n, KFOR-in, SHBA-në dhe EULEX-in.

“Nuk është e vërtetë që nuk dimë ne se çfarë rruge jemi duke shkuar, rruga jonë është rrugë e ligjshmërisë, e kushtetutshmërisë, e lirive dhe të drejtave të njeriut dhe pakicave, është rrugë e paqes dhe sigurisë, e cila bëhet në përputhje me mandatin tonë, me vullnetin e popullit dhe në bashkërendim me miqtë, aleatët dhe partnerët tanë perëndimorë”, tha kryeministri Albin Kurti.

Kurti ka thënë se nuk bëhet fjalë për kurrfarë prishjeje të raporteve me ndërkombëtarët.

Edhe Arbëri 11 maj 2024 Darka e refuzuar

Përfaqësuesit e serbëve kanë ofruar dorëheqje nga institucionet në katër komunat veriore, nga gjyqësori, Policia, Qeveria dhe Kuvendi, pas vendimit të Qeverisë që parasheh sanksione për ata që nuk i konvertojnë targat ilegale në RKS.

Bashkimi Evropian dhe Shtetet e Bashkuara i kanë kërkuar Kurtit që të shtyjë zbatimin e vendimit për targa, si dhe të themelojë Asociacioninin ashtu siç parashihet në marrëveshjen e arritur vite më parë në Bruksel.