Lajçaku thotë se vendimet e Qeverisë së Kosovës ia ndryshuan planet e temat

Vizita e emisarit të Bashkimit Evropian, Miroslav Lajçak, në Kosovë e Serbi ka marrë rrjedhë tjetër.

Nga një vizitë për përgatitje të takimit të ardhshëm të nivelit të lartë, Lajçak tani do të merret me reagimet që ka ngjallur vendimi i Qeverisë së Kosovës për vendosje të reciprocitetit në përdorimin e dokumenteve të identifikimit.

Në Serbi, i dërguari i posaçëm i BE-së për dialogun ka thënë se ky vendim ka ndryshuar temat dhe planet e vizitës së tij.

“Kam ardhur në rajon për ta përgatitur takimin e ardhshëm të liderëve dhe të flas për progresin dhe normalizimin e raporteve dhe tani duhet të zgjidhim këtë situatë. Nuk duhet të lejojmë të ketë krizë”, deklaroi Miroslav Lajçak, përfaqësues special i BE-së për dialogun Kosovë-Serbi, të enjten.

Lajçak nuk ka komentuar kërcënimet e presidentit të Serbisë, Aleksandër Vuciq, se veprimet e tyre pas vendimeve të Qeverisë do të jenë vdekjeprurëse.

“Kemi pasur diskutim shumë serioz mbrëmë për situatën dhe sigurisht duhet të shikojmë për zgjidhje nëpërmjet dialogut dhe jo konfrontimeve”, shtoi Lajçak.

Në Serbi, Lajçak të enjten është takuar me drejtorin e Zyrës për Kosovën në Qeverinë e Serbisë, Petar Petkoviq.

Në një njoftim të Qeverisë së Serbisë thuhet se me veprimet e fundit Qeveria e Kosovës ka vendosur në prag të humnerës procesin e dialogut.

“Pas ngjarjeve të djeshme Prishtina e solli dialogun në prag të humnerës dhe po bëhet gjithnjë e më e sigurt se marrëveshjet e arritura në Bruksel janë bërë të pakuptimta. Beogradi është veçanërisht i shqetësuar për mungesën e reagimit të komunitetit ndërkombëtar, i cili vëren në heshtje lëvizjet e politikanëve shqiptarë që çojnë në destabilizimin e situatës në terren dhe rrezikun e konfliktit, të cilin Prishtina e dëshiron pa dyshim”, thuhet në ragimin e Qeverisë së Serbisë.

Lajçaku ka takuar edhe kryetarin e Kuvendit të Serbisë, Ivica Daçiq,i cili ka thënë se mënyra të vetme për arritjen e një marrëveshjeje të qëndrueshme ndërmjet Beogradit dhe Prishtinës janë dialogu dhe kompromisi.

Në njoftimin e Kuvendit theksohet se Daçiqi po ashtu ka deklaruar se Beogradi mbetet plotësisht i përkushtuar ndaj dialogut dhe i gatshëm për vazhdimin e tij.

“Pala jonë është e gatshme të trajtojë shumë çështje të hapura në vazhdimin e dialogut, por duhet të theksojmë se nuk jemi të gatshëm të pranojmë asnjë vendim të njëanshëm”, ka thënë ai.

Gjatë vizitës në Kosovë, përfaqësuesi special i BE-së për dialogun, Miroslav Lajçak, është shprehur optimist se takimi i radhës mes kryeministrit Albin Kurti e presidentit të Serbisë do të zhvillohet para pushimeve të verës.