-
Nga:
Majlinda Ibrahimi
- 5 nëntor 2023 20:03
- Shpërndaje në:
Para anëtarëve të strukturave të Lëvizjes Vetëvendosje, kryetari i kësaj partie, Albin Kurti, u mburr për punën 2-vjeçare të ekzekutivit që ai udhëheq. Tha se do të rritet numri i ushtarëve e i policëve. E aktivistëve u bëri thirrje të jenë në komunikim të rregullt me popullin
Para strukturave të Lëvizjes Vetëvendosje, lideri i saj, që është edhe kryeministër, Albin Kurti, rikujtoi sulmin në Banjskë të Zveçanit ku humbi jetën rreshteri Afrim Bunjaku dhe premtoi të punojë më shumë në shtrirjen e sovranitetit në çdo cep të vendit.
Në mbledhjen e të gjitha pikave të Lëvizjes Vetëvendosje, të dielën në Prishtinë, Kurti tha se vitin e ardhshëm FSK-së e Policisë do t’iu shtohen edhe disa qindra pjesëtarë.
“U thoni të gjithë aktivistëve e qytetarëve që nuk do të mund të na ndalin as në jug e as në veri. Sot u bën gjashtë javë që na e vranë rreshterin Afrim Bunjaku, por në vitin 2024 do të kemi 600 ushtarë më shumë e 500 policë më shumë për ligj e kushtetutshmëri, për mbrojtjen dhe sigurinë e Kosovës sonë”, ka thënë Kurti.
Kryeministri foli edhe për qeverisjen e tij 2-vjeçare, duke theksuar se bruto produkti vendor është rritur mbi katër miliardë prej kur e mori mandatin për herë të dytë.
Ai tha se buxheti i shtetit për vitin e ardhshëm do të jetë mbi 3 miliardë euro. E këto mjete u zotua se do t’i shpenzojë në rritjen e cilësisë në arsim, shëndetësi dhe në përmirësimin e infrastrukturës rrugore e hekurudhore.
Nga kjo mbledhje, Kurti ua përçoi edhe një porosi aktivistëve. U kërkoi ta zgjerojnë komunikimin me popullin.
“Në asnjë mënyrë nuk bën të ndihemi rehat sikur e kemi përmbushur misionin kemi ende shumë sfida përpara dhe ende jemi në hapat e parë. Ndryshimin që ne dëshirojmë të sjellim në Kosovë për të kapur hapin e vendeve evropiane, është ende në fillimet e tij. Prandaj së bashku na duhet angazhim në struktura, që të zgjerohet komunikimi me popullin”, ka shtuar Kurti.
Mbledhja u mbajt në përvjetorin e vdekjes së aktivistit Astrit Dehari. LVV-ja ka vendosur që 5 nëntorin ta kthejë në takim të përvitshëm të aktivistëve.
