Kryeministri zotohet ta rrisë pjesëmarrjen e grave në institucionet e sigurisë

Në Konferencën e dytë vjetore të Federatës Ndërkombëtare të Grave për Paqe Botërore, kryeministri Albin Kurti është zotuar se do të angazhohet për rritjen e pjesëmarrjes së grave në institucionet e sigurisë. Aktualisht, në Policinë e Kosovës afro 15 për qind e punonjësve janë gra, ndërsa në FSK më pak se 10 për qind.

Kryeministri Albin Kurti është zotuar se do të bëjë përpjekje për ta rritur pjesëmarrjen e grave në institucionet e sigurisë.

Në konferencën e dytë vjetore të Federatës ndërkombëtare të Grave për paqe botërore që po mbahet në Prishtinë, kryeministri tha se s’ka paqe pa gratë.

“Institucionet e sigurisë janë të sigurta pikërisht me pjesëmarrjen e këtyre grave dhe ato ofrojnë siguri në shoqëri. Në këtë drejtim, një prej objektivave strategjike të Programit në Kosovë për Barazi Gjinore 2020-2024 është avancimi i realizimit të drejtave në vendimmarrje, paqe, siguri dhe drejtësi”, tha Kurti.

Aktualisht, në Policinë e Kosovës afro 15 për qind e punonjësve janë gra, duke përfshirë 1 mijë e 38 në uniformë dhe 286 që janë pjesë e stafit civil.

Ndërsa në Ministrinë e Mbrojtjes dhe FSK, gra janë gjithsej 9.75 për qind të punonjësve apo 401 ushtarake dhe punonjëse civile.

Presidentja e Federatës Ndërkombëtare të Grave për Paqe Botërore, Moriko Hori, tha se gratë janë të rëndësishme për sigurinë dhe paqen në rajon.

Edhe Arbëri 8 mar 2026 Kurti: Gratë po i fuqizojmë përmes punësimit e mbështetjes ekonomike

“Është me rëndësi që sot ta njohim dhe pranojmë rëndësinë që e kanë gratë për sigurinë dhe paqen në rajon. Gratë kanë qenë agjendë e paqes dhe kanë promovuar dialogun dhe pajtimin”, tha Hori.

Gjatë ditës është lansuar edhe projekti “Instrumenti për barazinë gjinore”, që ka për qëllim zhvillimin e barabartë socio-ekonomik për gratë dhe burrat në Kosovë.