-
Nga:
Valbona Bytyqi
- 12 nëntor 2025 19:12
- Shpërndaje në:
Një komision i veçantë i formuar të mërkurën nga KQZ-ja do të merret me vlerësimin e fletëvotimeve, në të cilat u hasën dallime në numrat serikë. Për gabimet në to një raport është dorëzuar edhe nga kompania, por që në mbledhjen e KQZ-së, nuk janë dhënë shumë hollësi për përmbajtjen e tij
Gabimet në numrat serikë të fletëvotimeve nuk janë bërë vetëm në Komunën e Mitrovicës së Jugut e të Gjakovës, por edhe në ato që janë shpërndarë nëpër komuna të tjera, ka konfirmuar Komisioni Qendror i Zgjedhjeve.
Kryetari i KQZ-së, Kreshnik Radoniqi, duke iu referuar një raporti të ri nga kompania që i ka printuar fletëvotimet, tha se informacione kanë marrë për të gjitha fletëvotimet, porse ato duhet konfirmuar me hapjen e kutive.
“Në atë raport i saktësojnë gabimet në të gjitha dengjet të fletëvotimeve të printuara ku rezulton që në këto dengje janë votat e fundit, afër dy votat e fundit që kanë pas numra të vendvotimeve të ndryshme, të ndonjë qendër tjetër apo edhe disa prej tyre të zbrazëta...Kanë dhënë numrin e saktë që kanë vlerësu se kanë ndodhë gabimet por që të gjitha ne dihet të konfirmojmë dhe verifikojmë nga kutitë e votimit”, tha Radoniqi.
Në mbledhjen e KQZ-së, me gjithë kundërshtimin e anëtarëve të PDK-së, është formuar një komision prej Sekretariatit, që do te merret me vlerësimin e fletëvotimeve të zgjedhjeve të raundit të dytë.
“Me qëllim që të realizohet një vlerësim i detajuar për fletëvotimeve të përdorura dhe numrin e përgjithshëm të fletëvotimeve në Mitrovicë të Jugut dhe Gjakovë, si dhe në komunat e tjera sipas mostrimit të bazuar në metodologjinë, është e nevojshme vendimmarrja për formimin e komisionit i cili do të bëjë hapjen e kutive”, tha u.d. i kryesuesit të Sekretariatit të KQZ-së, Besnik Buzhala
Votën kundër këtij komisioni, paraprakisht e arsyetuan anëtarët e PDK-së në KQZ.
“Këto analiza apo raporte që e përfshijnë KQZ-në apo e bëjnë palë në raport me vendimmarrjen e PZAP dhe Gjykatës Supreme janë një hap përtej kompetencave”, tha Arianit Elshani, anëtar i PDK-së në KQZ-së.
Ndërsa bashkëpartiaku i tij Ilir Gashi, th se pë këtë duhet që organe të krijojnë edhe Prokuroria e edhe PZAP-ja.
Ndryshe e vlerësuan situatën anëtarët e Vetëvendosjes në KQZ.
“Trendi mund të jetë më i madh në komunat e tjera qysh ishte në Gjakovë krahasuar me Mitrovicë....174 fletëvotime të shtypura(Gjakove) kundrejt Mitrovicës që është 116 nese nuk gaboj”, tha Alban Krasniqi, anëtar i LVV-së në KQZ.
Përplasje mes anëtarëve të PDK-së e VV-së nxiti edhe çështja nëse KQZ-ja ishte e informuar që nga fillimi për problematikën.
Rekomandimi i Sekretariatit mori përkrahjen e 8 prej 11 anëtarëve të KQZ-së. Përveç dy anëtarëve të PDK-së që votuan kundër, për formimin e tij abstenoi Muharrem Nitaj i AAK-së.