Gruaja arrestohet për raportim të rremë të dhunimit

Policia ka arrestuar një grua me inicialet N.R., pasi që dyshohet që ajo ka raportuar rrejshëm se është grabitur dhe është dhunuar seksualisht teksa po ecte bashkë me të birin e saj pranë varrezave në Gjilan. Me vendim të prokurorit, e dyshuara është dërguar në mbajtje prej 48 orësh

Pak ditë pasi që raportoi se është grabitur dhe është dhunuar seksualisht teksa po ecte bashkë me të birin e saj në një rrugë në Gjilan, gruaja me inicialet N.R. është arrestuar të enjten nën dyshimin se e ka inskenuar të gjithë ngjarjen.

Ajo është dërguar në mbajtje prej 48 orësh, ndërsa është e dyshuar për veprën panele “lajmërimi apo kallëzimi i rremë”.

“Bazuar në provat e marra, deklarimet e palëve të përfshira në rast, raportet mjekësore nga Instituti i Mjekësisë Ligjore, analizimi i shumë materialeve me videoincizime janë siguruar dëshmi se gjithë ngjarja ka qenë një inskenim dhe e njëjta ka raportuar rrejshëm me rastin e lajmërimit të saj në 
polici. Me urdhër të prokurorit e dyshuara gjendet në ndalim 48-orësh”, është bërë e ditur në njoftimin e Prokurorisë Themelore në Gjilan.

Rasti është evidentuar edhe në raportin 24-orësh të Policisë, i cili është publikuar të dielën e shkuar. 
Të dielën e 25 majit KOHA pati kontaktuar me drejtorin e Spitalit Rajonal të Gjilanit, Arsim Emini, i cili pati thënë se e dyshuara N.R. është pranuar në këtë spital e shqetësuar, me gërvishtje nëpër trup dhe me gjakdrrjedhje të pakët vagjinale. Ai ka bërë të ditur se rasti i saj është proceduar për në Institutin e Mjekësisë Ligjore. 

E, të enjten, Emini ka thënë se raporti i përpiluar nga mjekët e Spitalit të Gjilanit është profesional, porse nuk e ka përjashtuar mundësinë që plagët dhe shenjat e evidentuara në raport të jenë inskenuar nga e dyshuara.

Gruaja, e cila tashmë është arrestuar, pati raportuar në Polici se derisa ka qenë duke ecur tek varrezat e qytetit të Gjilanit, së bashku me të birin e saj, ajo ishte ndaluar nga dy persona të maskuar, të cilët nën kërcenim e kishin tërhequr brenda rrethojës së varrezave, ku më pas e kishin dhunuar seksualisht dhe ia kishin grabitur me forcë edhe stolitë e arit.