Misioni i NATO-s në Kosovë ka konfirmuar të premten se pjesëtarë të grupeve kriminale kanë nxitur tensionet në veri dhe kanë sulmuar ushtarët e KFOR-it. Zëdhënësi i Shtabit të KFOR-it, Andrea Gallien, ka thënë se protesta e zhvilluar të hënën më 29 maj ka nisur e qetë, porse ndërkohë ajo ka përshkallëzuar.
“KFOR-i ishte aty për të parandaluar përshkallëzim të mëtejmë të protestës dhe më 29, në një komunë të veçantë (Zveçan v.j.) ndodhi një protestë e madhe. Ushtarët e KFOR-it u përfshinë në protestën e dhunshme. Gjatë protestës shumë ushtarë u lënduan nga gurë, eksplozivë të improvizuar dhe armë zjarri. Ishte e qartë se njerëzit po tentonin të protestonin në mënyrë paqësore, por ishte e qartë se prapa tyre po fshiheshin grupe kriminale që tentonin të sulmonin trupat e KFOR-it”, ka bërë të ditur në një konferencë për media të mbajtur të premten.
Gallien ka sqaruar se i takon Policisë së Kosovës që të ndërmarrë veprimet e nevojshme e të identifikojë pjesëtarët e këtij grupi.
“Ishte e qartë se qytetarët deshën protesta paqësore, por prapa tyre fshiheshin grupe të organizuara që të sulmojnë dhe është detyrë parësore e Policisë së Kosovës, për shkak se është përgjegjëse për sundimin e rendit e ligjit, që të ndërmarrë veprimet e nevojshme për të gjetur këto grupe dhe nëse ka krim t’i kapë”, ka theksuar ai. “Kur gjuan gur, përdor mjete shpërthyese të improvizuara dhe armë gjatë protestës, nuk mund të them se ishte protestë paqësore. Ndërhyrja e ushtarëve të KFOR-it parandaloi që njerëzit e përfshirë në protestë të mos vriteshin dhe lëndimet e ushtarëve tanë janë dëshmi e asaj se çfarë ka ndodhur”.
Që nga 26 maji protestues në tri komunat veriore: Zveçan, Leposaviq e Zubin-Potok kanë kundërshtuar praninë e kryetarëve të rinj në objektet komunale. Gjatë përleshjes me protestuesit, më 29 maj mbetën të lënduar 30 ushtarë të KFOR-it e disa zyrtarë policorë.
Sipas zëdhënësit të Shtabit të KFOR-it, veprimet nga autoritetet e Kosovës kanë qenë të njëanshme dhe janë bërë pa koordinim. Gallien bëri thirrje që palët të mos ndërmarrin veprime të njëanshme, pa marrë parasysh rrezikun e pasojat e veprimeve të ndërmarra. Ai po ashtu ka theksuar se palët duhet të shohin dialogun si të vetmen mënyrë të zgjidhjes së problemeve.
“Është e rëndësishme, qenësore që të gjithë të përmbahen nga deklarimet e panevojshme, sepse në këtë moment vetëm dialogu në mes të dy palëve duhet të shihet si mundësi e vetme për të zgjidhur situatën dhe është po ashtu detyrë e KFOR-it që të sigurojë kushte për dialogun e ndërmjetësuar nga BE-ja që të ecë përpara dhe të gjendet një zgjidhje për këtë problem në zonë”, ka deklaruar ai.
Gallien konfirmoi që me Policinë e Kosovës nuk janë koordinuar për të marrë nën kontroll situatën e sigurisë në Leposaviq e Zveçan, ku që nga 30 maji dhjetëra ushtarë janë duke siguruar objektet komunale. Prania e KFOR-it në veri, sipas tij, varet nga situata e sigurisë në atë pjesë dhe se ky mision nuk ka për synim që të marrë kontrollin në këtë pjesë. Një afat kohor, deri kur trupat e KFOR-it do të vazhdojnë të qëndrojnë përreth objekteve komunale, po ashtu nuk është i vendosur.
Megjithëkëtë, zëdhënësi i Shtabit të KFOR-it ka thënë se ndonëse janë ulur tensionet, situata është e paqëndrueshme.
“Pra, derisa të ketë një situatë tensioni, e cila mund të përshkallëzohet në çdo moment në një nivel më të lartë të dhunës, KFOR-i do të jetë i pranishëm”, ka thënë ai, derisa shtoi se si mision janë të përgatitur që të reagojnë në çfarëdo situate.
Gallien bëri të ditur se përveç 11 ushtarëve të kontingjentit italian të lënduar e 19 nga ai hungarezë, janë lajmëruar edhe disa raste të lëndimeve por që, sipas tij, kanë qenë më të lehta.
Aktualisht situata në Leposaviq e Zveçan paraqitet të jetë më e qetë për dallim nga ditët e para të nisjes së saj që ishte më e tensionuar. Krahasuar me numrin më të madh të protestuesve, ditëve të fundit numri i pjesëmarrësve është zvogëluar.
Protestat në tri komunat me shumicë serbe, Leposaviq, Zveçan e Zubin-Potok, kanë filluar që nga 26 maji dhe janë duke vazhduar ende. Ndërmjetësit ndërkombëtarë të BE-së dhe të SHBA-së kanë shtuar angazhimin për të bindur autoritetet qeverisëse në Kosovë e në Serbi për të gjetur zgjidhje që shmang dhunën në veri, përfshirë edhe mundësinë e mbajtjes së zgjedhjeve në katër komuna.
© KOHA. Të gjitha të drejtat janë të rezervuara.
