Brenda 15 minutash në seancën e jashtëzakonshme të Kuvendit Komunal të Prishtinës, këshilltarët opozitarë, të përkrahur nga kryesuesi Fehmi Kupina, kanë votuar për t’i shkarkuar aksionarët e vjetër dhe kanë emëruar ata të rinj, të cilët janë kryesisht pjesë e Lëvizjes Vetëvendosje, Aleancës Kosova e Re, Aleancës për Ardhmërinë e Kosovës dhe të Nismës. Në këtë seancë, kryetari i Komunës, Përparim Rama, dhe përfaqësuesit e LDK-së dhe PDK-së në pushtet nuk kanë morën pjesë

25 këshilltarë nga radhët e subjekteve opozitare janë bërë bashkë të enjten, në një seancë të jashtëzakonshme të Kuvendit Komunal në Prishtinë, për t’i shkarkuar aksionarët e dy subjekteve në pushtet – Lidhjes Demokratike (LDK) dhe Partisë Demokratike (PDK) – nga ndërmarrjet publike komunale.

Me 25 vota për, asnjë kundër dhe një abstenim, aksionarë të rinj në bordin e “Termokosit” janë zgjedhur Nora Kelmendi, Gëzim Mehmeti e Sami Borovci, në ndërmarrjen “Pastrimi” janë zgjedhur Femi Osmani dhe Petrit Reçica. Triera Kosumi dhe Gëzim Sveçla janë zgjedhur aksionarë në ndërmarrjen “Trafiku Urban” e në atë “Prishtina Parking”, Fatmir Kelmendi e Besnik Haziri. Ndërkaq Kushtrim Mushica e Endrit Gashi janë caktuar aksionarë të “Pallatit të Rinisë”, përderisa Teutë Gjinolli dhe Arbnora Berisha në “Kuzhina Qendrore” e Arianit Beqiri në Ndërmarrjen Publike Banesore (NPB).

Aksionarët e rinj janë kryesisht nga radhët e Lëvizjes Vetëvendosje (LVV), Aleancës Kosova e Re (AKR), Aleancës për Ardhmërinë e Kosovës (AAK) dhe të Nismës.

Shkarkimi i aksionarëve të mëparshëm është mundësuar brenda 15 minutash, pasi që këshilltarëve opozitarë u është bashkuar edhe kryesuesi i Kuvendit Komunal, Fehmi Kupina. Ndërkaq kryetari i Komunës, Përparim Rama, dhe këshilltarët nga LDK-ja dhe PDK-ja e kanë bojkotuar seancën, e cila nuk do të mund të mbahej po qe se kuorumin nuk do ta bënte kryesuesi Kupina.

Ai, që në fillim të mbledhjes, ka dhënë dorëheqje nga LDK-ja, teksa ka deklaruar se punën në Kuvendin Komunal do ta vazhdojë si kryesues i pavarur.

“Nuk do t’i përkas asnjë partie apo grupi politik. Mandatin tim si kryesues i Kuvendit dhe si anëtar i pavarur do ta ushtroj në përputhje me ligjet e Republikës së Kosovës dhe do të jem besnik i secilit votues dhe secilit qytetar të Prishtinës”, ka thënë ai.

Mes zyrtarëve të Prishtinës është diskutuar se arsye e largimit të kryesuesit nga LDK-ja ishte mosemërimi i dhëndrit të tij, Gent Begolli, si kryeshef në njërën prej ndërmarrjeve publike komunale dhe se kjo do të realizohet tani nga LVV-ja. Por këtë, Kupina e ka hedhur poshtë kur është pyetur nga KOHA.

“Nuk është e vërtetë që po e bëj për Gentin, ata mund të më akuzojnë për çfarë duan, por po e bëj për qytetarët e Prishtinës”, ka theksuar ai.

Pas dorëheqjes së tij, në seancën e Kuvendit Komunal kërkesën për shkarkimin e aksionarëve e ka parashtruar këshilltari të vetëm i Nismës, Endrit Zabërgja.

“Duke përfaqësuar parti të ndryshme për bindje të njëjta në raport me shqetësimet e qytetarëve të Prishtinës për qeverisjen dhe menaxhimin dhe në veçanti me veprimet, parregullsitë, shkeljet dhe mosrespektimin e ligjshmërisë në ndërmarrjet publike komunale të Prishtinës, për të vazhduar me politizimin e tejskajshëm të secilës ndërmarrje, mosraportimin e rregullt, ngecjet e vazhdueshme, si dhe ankesat nga stafi dhe qytetarët në lidhje me shërbimet dhe performancën e tyre, duke e ditur se ka kaluar mbi një vit nga plotësimi i komisionit të aksionarëve dhe rezultati pozitiv i ndërmarrjeve do të ishte i dukshëm deri më tani, konsiderojmë se është momenti i fundit për të reaguar ndaj mentalitetit mashtrues dhe nënshtrues që po tentohet të shpërndahet në kryeqytet e që po e lulëzon keqpërdorimin me gjysmën e këtyre ndërmarrjeve nëpër zyrat e Prokurorisë”, ka thënë ai.

E pas votimit në të cilin është zgjedhur aksionar i NPB-së, këshilltari i LVV-së, Arianit Beqiri, ka thënë se parregullsitë në këtë ndërmarrje nuk lidhen me inate me ish-partiakët nga Partia Socialdemokrate (PSD), përderisa ka paralajmëruar një “pastrim” në ndërmarrjen e pasur publike.

“Nuk ka kurrfarë lufte partiake PSD-PDK apo çfarëdo qoftë tjetër. Ne jemi të vetëdijshëm që në atë vend ka parregullsi, se ka pasur dhe ka shkelje të mëdha”, ka thënë Beqiri për NPB-në.

Aksionarët e rinj në 10 ndërmarrjet publike do të duhet të bashkëpunojnë me nga një aksionar, që është emëruar nga kryetari Rama, e për të cilët të drejtën e shkarkimit dhe emërimit e mban vetëm ai.

Rama nuk u është përgjigjur pyetjeve të KOHËS nëse do ta lëkundë koalicionin me PDK-në nisma e opozitës. Teksa është zgjedhur për kryetar të komunës me listë të LDK-së, Rama vazhdimisht ka folur për rëndësinë e bashkëpunimit me partitë e tjera në komunë.

Leg: 25 këshilltarë nga radhët e subjekteve opozitare janë bërë bashkë të enjten, në një seancë të jashtëzakonshme të Kuvendit Komunal në Prishtinë, për t’i shkarkuar aksionarët e dy subjekteve në pushtet – Lidhjes Demokratike (LDK) dhe Partisë Demokratike (PDK) – nga ndërmarrjet publike komunale