Një edukatore në një çerdhe private në Mitrovicë ka goditur me shuplakë një fëmijë. Në çerdhe thanë se videot e dëshmojnë momentin e dhunës. Ndërkaq, prindërit e 4-vjeçarit që ende nuk flet, thanë të kenë parë shenja dhune tek ai edhe më herët.
Këto janë shenjat e dhunës ndaj një 4-vjeçari që, sipas nënës së tij, i janë shkaktuar të hënën në mesditë gjatë qëndrimit në çerdhen private “Nina” në Mitrovicë.
Ajo thotë se është lajmëruar nga drejtoresha e çerdhes dhe se i janë treguar video-incizimet në të cilat shihet edukatorja tek e godet me shuplakë fëmijën, për të cilin tha se nuk flet akoma.
“Në atë video e kam parë që mësuesja e grupit në këtë rast, se ajo mësuese me përpara ka qenë mësuese mbështetëse e djalit tim. Mirëpo dy javët e fundit ka kalu në mësuese të grupit. Gjatë kohës kur djali ka dashtë me flejt, djali nuk kish dashtë me flejtë, kështu që mësuesja e ka goditë edhe shenjat i ka pasur në fytyrë”, ka thënë Vlora Musliu-Ibishi, nëna i fëmijës.
Nëna e fëmijës thotë se shenja dhune ka parë edhe më herët.
“Ja kapsha flokët edhe mu mbushke grushti kime. Tash s’po di a fëmijët e tjerë e kanë lëndu apo ndoshta mësuesja. Dhe një herë i ka pasur veshët e kuq”, ka thënë ajo.
E Agnesa Shipoli-Nika, drejtoreshë e kopshtit, pranoi që të hënën fëmija është goditur me shuplakë nga edukatorja, për të cilën tha se me vendim të kopshtit është larguar nga puna.
“E kam thirrë edukatoren, i kom kërku informacione lidhur me rastin që ka ndodhur, e ka pohu menjëherë dhe ka thënë që është rast në afekt”, ka thënë drejtoresha e çerdhes Agnesa Shipoli-Nika.
Sipas drejtoreshës, në gjendje të keqe emocionale ka qenë edukatorja, me të cilën KOHA nuk ka arritur të kontaktojë.
Prindërit e 4-vjeçarit thonë se ajo i ka telefonuar dhe ju ka kërkuar falje për këtë veprim.
Në Prokurorinë Themelore në Mitrovicë treguan se janë duke u zhvilluar hetime për këtë rast.
“Është njoftuar prokurori kujdestar dhe është iniciuar rast në drejtim të veprës penale ‘keqtrajtimi apo braktisja e fëmijës’. Prokurori i shtetit në bashkëpunim me Policinë e Kosovës janë duke zhvilluar hetime intensive në mënyrë që ky rast të zbardhet në plotni”, ka thënë zëdhënësi në Prokurorinë Themelore në Mitrovicë, Valon Preteni.
Pas këtij rasti dhune, prindërit e 4-vjeçarit kanë vendosur ta tërheqin nga kopshti atë, bashkë me fëmijën tjetër.
Edhe prindër të fëmijëve të tjerë u është lëkundur besimi në çerdhen.
“Jam e dyshimtë mos me i pru ndoshta se unë nuk jam këtu, jam në shpi tu nejt, mundem mos me sjellë hiç edhe mos me shpenzu 95 euro e paguajmë mujoren. Edhe me shpenzu, edhe me ta rreh fëmijën, ky është shumë gjest i ulë”, ka thënë Mihane Kuçani, prind.
Në Kosovë janë të licencuara 205 çerdhe private. Ministrja e Arsimit, Arbërie Nagavci, tha se dhuna është e patolerueshem dhe e dënueshme, por nuk ka përmendur ndonjë masë ndaj kopshtit.
