Me parullën, “Jo në emrin tim”, protestuesit ia kanë mësyrë sheshit të Prishtinës për ta kundërshtuar dënimin me 26 vjet burgim të komandantit të UÇK-së, Salih Mustafa, nga Gjykata Speciale. Në protestën e thirrur nga PSD-ja morën pjesë edhe organizatat e dala nga lufta e disa deputetë të PDK-së. Në mesin e tyre edhe familjarë të Mustafës i njohur në luftë me nofkën Cali. Protestuesit në duar kanë mbajtur parullat me emrat e të gjithë të akuzuarve për krime lufte që po mbahen në paraburgim në Hagë. Marshit i priu në mes të tjerëve edhe djali i Calit. Protestuesit që thërrisnin “liri për çlirimtarët” kanë ecur nga sheshi që mbanë emrin e komandantit Zahir Pajaziti deri tek ai me emrin e presidentit Ibrahim Rugova.
Kreu i PSD-së, Dardan Molliqaj, ka thënë me këtë protestë po kërkohet edhe që të ndryshohet juridiksioni i Gjykatës, në nenet 6 dhe 16 të Ligjit për Dhomat e Specializuara dhe Zyrën e Prokurorit të Specializuar.
“Andaj, neni 6 i këtij ligji duhet të kërkojë ndjekjen e krimeve e jo përndjekjen e UÇK-së. Nëse duam drejtësi, ndiqen krimet, nëse duam padrejtësi ndiqet UÇK-ja dhe përpjekja jonë për liri. Neni 16 po i jep mundësi Gjykatës për vendim arbitrar, sepse përmes këtij neni, nuk po kërkohen më dëshmi dhe prova, por po kërkohen komandantët e udhëheqësit për t’u dënuar”, ka thënë Molliqaj.
Sipas tij duhet të ketë bashkëpunim të krejt popullit, meqë siç ka thënë, nën akuzë është përpjekja për liri, themeluesit e UÇK-së, Shtabi i Përgjithshëm e komandantët e zonave operative.
Lideri i PSD-së ka theksuar se nuk kanë dalë në shesh as për t’i dekoruar ata që e kundërshtuan Gjykatën në Kuvend e as për t’i fajësuar ata që e kishin votuar.
“Ata që e kanë kundërshtuar këtë Gjykatë, nëse e kanë pasur përnjëmend e kanë detyrë dhe obligim sot me e luftu edhe më shumë se atëherë. E ata që e kanë votuar këtë Gjykatë nën presionin e akuzës për trafikim organesh, sot e kanë të drejtën legjitime, historike, demokratike ta kundërshtojnë edhe më shumë se sa ata që e kundërshtuan”, ka thënë Molliqaj.
Faton Klinaku që po drejton OVL-në, në mungesë të Hysni Gucaitit i cili gjendet në burg në Hagë, ka thënë se padrejtësitë e Gjykatës i kanë adresuar disa herë me kërkesa ndaj deputetëve, të cilat ka thënë se nuk ishin përfillur. Prandaj, ka kërkuar që kësaj here, Kuvendi i Kosovës të jetë në nivel të detyrës dhe ta ndryshojë ligjin e Dhomave të Specializuara.
“Padrejtësia tjetër e kësaj Gjykate ishte edhe dënimi për krime Lufte ndaj komandant Sali Mustafa – Cali, i cili u dënua me 26 vjet burgim me dosje të përpiluara nga Serbia, me dëshmitarë të fshehur nga populli, e dënim në emër të popullit, për vrasjen që është kryer nga Serbia. Çfarë absurdi i llojit të vet”, ka deklaruar Mustafa.
Nëse deputetët nuk i përgjigjen pozitivisht kërkesës së PSD-së për ndryshimin e Ligjit, Molliqaj ka thënë se një gjë të tillë do ta bëjnë përmes peticionit.
Klinaku ka përmendur edhe krerët e OVL-së së UÇK-së, Hysni Gucatin e Nasim Haradinajn për ta akuzuar Specialen se ka bashkëpunuar me Serbinë.
“Për arsye të kundërshtimit të padrejtësive, krerët e Organizatës së Veteranëve, Hysni Gucati e Nasim Haradinaj gjenden prapa grilave në Hagë, gjoja për pengim të drejtësisë. Në vend se Specialja ta hetojë veten e saj për skandalet që i dolën nga zyrat e tyre, ata mbi dy vjet mbajtën peng Hysniun e Nasimin dhe kur e shqiptuan dënimin e bënë me direktiva politike. Si mund të dënohen krerët e organizatës me nga katër vjet e gjysmë, sepse organizata e jonë e ka njoftuar publikun për bashkëpunimin me Dhomat e Specializuara me pushtuesin serb”, ka deklaruar ai.
© KOHA. Të gjitha të drejtat janë të rezervuara.
