LAJMET E MBRËMJES

PSD-ja kërkon nga Kuvendi ndryshimin e Ligjit për Dhomat e Specializuara

Partia Socialdemokrate ka dorëzuar në Kuvendin e Kosovës një kërkesë përmes së cilës po kërkon ndryshimin e neneve 6 dhe 16 të Ligjit për Dhomat e Specializuara dhe Zyrën e Prokurorit të Specializuar. Iniciativën PSD-ja e ka marrë pas dënimit të ish-komandantit të UÇK-së, Salih Mustafa. Si kundërshtim të këtij dënimi, kjo parti joparlamentare ka paralajmëruar edhe një protestë për të shtunën

Partia Socialdemokrate po kërkon ndryshimin e Ligjit për Dhomat e Specializuara dhe Zyrën e Prokurorit të Specializuar.

Në Kuvendin e Kosovës kreu i saj, Dardan Molliqaj, ka dorëzuar të mërkurën kërkesën për ndryshimin e neneve 6 dhe 16 të këtij ligji.

Sipas PSD-së, të dy nenet nuk janë në përputhje me të drejtën dhe konventat ndërkombëtare për krime lufte

“Njëri ka të bëjë me konventën lëndore, që e trajton subjektin e ndjekjes nga kjo gjykatë e që është trajtimi prej bazës së nenit 6 ku ndiqen vetëm krimet e UÇK-së. Prandaj ne besojmë se kur krimet ndiqen vetëm prej njërës anë ose njëetnike, ajo nuk ka të bëjë me drejtësi, por padrejtësi. Rrjedhimisht duam të ndërrojmë që të kthejmë këtë gjykatë që të sillte drejtësi. Neni i dytë që duam të riformulojmë është ai 16 mbi përgjegjësinë individuale dhe komanduese në veprimet e supozuara që mund të kenë ndodhur”, ka thënë Molliqaj.

Këtë kërkesë Molliqaj e ka dorëzuar me emër të secilit deputet të Kuvendit me përjashtim të atyre të Listës Serbe.

“Sot u bëj thirrje gjithë deputetëve që të jenë në nivelin e detyrës, pasi ata janë përfaqësues të popullit të Kosovës. Populli është i qartë se nuk e duron këtë padrejtësi që vjen nga Gjykata Speciale”, ka thënë Molliqaj.

Ditë më parë Gjykata Speciale ia shqiptoi ish-komandantit të UÇK-së, Sali Mustafa, dënimin prej 26 vjetësh burgim e për ta kundërshtuar këtë Partia Socialdemokrate ka paralajmëruar protestë për të shtunën.

Dënimin ndaj Mustafës, i njohur në luftë me nofkën “Cali”, të mërkurën e ka cilësuar si të ashpër deputeti gjerman Knut Abraham. Megjithatë, ka thënë se duhet të pranohet nga të gjithë.

“Është një aktgjykim i ashpër, i cili sigurisht ngjalli kujtimin e ngjarjeve të tmerrshme që ndodhën kundër shqiptarëve të Kosovës në atë kohë, por edhe vuajtjen e shumë serbëve”, ka thënë ai.

Ligji për Gjykatën Speciale është miratuar në gusht të vitit 2015 nga Kuvendi.

Dy vjet më vonë ishte marrë një iniciativë për zhbërjen e kësaj gjykate, por nuk pati përkrahjen e të gjithë deputetëve.

Arrestimet e para kjo gjykatë i ka bërë më 2020, e në mesin e të arrestuarve ishte edhe presidenti i asaj kohe, Hashim Thaçi.