Ka vdekur piktori i njohur shqiptar, Zef Toçi. Lajmin për vdekjen e artistit të shquar e kanë dhënë familjarë të tij, nëpërmjet një njoftimi të martën vonë.
Ai ishte 80 vjeçar. Zef Toçi u bë emër si një prej figurave më unike të artit në Kosovë, pjesëtar i gjeneratës që fuqizuan artin akademik në këto anë.
Ishin maestrot Muslim Mulliqi e Gjelosh Gjokaj të parët që identifikuan talentin e tij të jashtëzakonshëm në Shkollën e Lartë Pedagogjike kur ai ishte nxënës i gjeneratës së parë.
Zef Toçi u diplomua për pikturë në Akademinë e Arteve në Bruksel më 1972 në klasën e prof. Georgina Iserbut. Po atë vit u shpall Student i Vitit dhe u dekorua me medalje nga Mbretëria Belge. Emri i tij u shënua në këtë Akademi. Vazhdoi studimet postdiplomike në Akademinë e Arteve në Beograd ku diplomoi më 1981 në klasën e prof. Zoran Petroviqit.
Qysh herët krijimtaria e tij u pa jashtë vendit. Pas dy ekspozitave në Prizren, më 1966 dhe më 1967, në vitin 1968 ekspozoi në Galerinë e Arteve në Bruksel. Po atë vit, hapi ekspozitë në Qendrën e Kulturës në Prizren, më 1969 në Beograd, më 1971 në Qendrën e Kulturës në Mol të Sllovenisë, në Opati të Kroacisë më 1972, kur ekspozoi sërish në Bruksel, më pas asokohe në Teatrin Popullor Krahinor (1974), në Beograd më 1976 sikurse edhe në Prizren e Prishtinë.
Edhe
Zef Toçi – surrealisti që përcolli me art ritmin e jetës
Më 1999 hapi ekspozitë në Prizren e tek më 2010 u hap ekspozita e tij personale në Galerinë Kombëtare të Kosovës. U ekspozuan 40 vepra, një përzgjedhje prej opusit të tij të gjerë prej mbi një mijë, e të cilat, jo pak, gjenden në galeri e koleksione jashtë vendit.
"Unë e di se piktura është përkushtim dhe jam i kënaqur me atë që kam bërë", do të thoshte Toçi në një intervistë vite më parë.
Maestro Toçi dallohej për stilin surrealist të shprehjes së tij artistike. Jetoi e punoi në Prizren ku kishte atelieun e tij të veçantë në "Shadërvan".
Varrimi i tij është bërë sot në Varrezat e Prizrenit.
Edhe
Vdiq Rexhep Qosja
Ndërkohë, ministri i Kulturës, Rinisë dhe Sportit, Hajrulla Çeku, i ka nisur familjes telegram ngushëllimi.
“Me pikëllim sot mora lajmin për ndarjen nga jeta të piktorit të njohur, Zef Toçi dhe ju shpreh ngushëllimet e mia më të sinqerta. Sot vendi ynë ka humbur një person shumë të veçantë. Maestro Toçi ka qenë një prej artistëve që dha kontribut të lartë në kulturën tonë, veçanërisht në fushën e artit pamor, duke ngritur dhe jetësuar vlerat tona kombëtare për më shumë se gjysmë shekulli. Ne do ta kujtojmë gjithmonë si shembull për punën, atdhedashurinë dhe mirësinë e tij. Ndërsa krijimtaria që ka lënë pas do tu shërbejë gjeneratave të tëra”, thuhet ndër të tjera në telegramin e ngushëllimit të ministrit Çeku.
